Jurada

Informacions cap a la JURADA de 2016


Entreten oral : lo 13 e lo 14 de junh a Besièrs e a Tolosa.

Reçaupretz un convit debuta de junh que vos indicarà lo luòc e l'ora de passatge.


 

Espròvas escritas : lo 22 de junh a Besièrs.

Los candidats retenguts per las espròvas escritas reçaupràn un convit amb lo detalh dels oraris.


 

 

 

 

La jurada es una avaloracion diagnostica dobèrta a totes los qu'an lo desir d'ensenhar dins una escòla Calandreta. Es l'examen d'intrada a APRENE. Es pas un concors.

 

Las Calandretas son d’escòlas bilingüas ont la lenga ensenhanta es l’occitan. Los mainatges escolarisats a Calandreta son en majoritat d'ostals francoparlants. La problematica prepausada als regents de las Calandretas es de trasmetre la lenga occitana viva d'un biais natural en prepausar l'immersion tant completa coma possible a l'escòla. En mai de la lenga, trasmeton a l’encòp la cultura d’òc.

 

Per anar a la jurada, vaquí cossí vos cal far en 5 ponches :

1- S'encartar : ligam

L'inscripcion se fa en linha :

  • Telecargar lo formulari, l'emplenar electronicament e lo registrar per que lo contengut siá plan salvagardat.

  • Mandar a aprene@aprene.org lo formulari completat acompanhat d'un CV e d'un tèxt per explicar son desir d'ensenhar en occitan.

2- Se preparar :  ligam

  • Prene contacte amb una Calandreta per demandar l'autorizacion de viure (escotar e observar) una mièja jornada o una jornada dins una classa.

  • Causir demèst qualques obratges e legir las ressorças a posita per descobrir mai çò qu'es l'immersion, la pedagogia institucionala e las tecnicas Freinet.

3- Participar a un entreten :

L'establiment APRENE vos convocarà per un escambi oral a Besièrs o a Tolosa. Rencontraretz diferents actors del movement Calandreta (Federacion Regionala, establiment APRENE, regents) que vos escotaràn a prepaus de vòstre projècte professional. Se mesurarà vòstre gra d'endralhatge dins la lenga occitana e vòstra capacitat a vos metre «en movement». Serà l'escasença tanben de respondre a vòstras questions e, perqué pas, de vos donar de precisions que desiratz d'aver.

Al cap de l'entreten, los representants de Calandreta decidiràn se cal persegre amb la convocacion a la partida escricha de la Jurada.

 

4- Participar a l'escrich :  ligam

Seretz convidats a una jornada ont produsiretz d'escriches a partir de subjèctes dins 4 domenis : occitan, pensada, matematicas e francés.

 

5- Aprèp l'escrich :

Cada còpia, anonimada, serà corregida per dos correctors.

Aqueste dispositiu permet mai que mai de mesurar las capacitats d'APRENE a menar los candidats cap a la mesa en òbra de las exigéncias de la Carta de las Calandretas en classa e dins una escòla, e cap al nivèl de competéncias demandat al CRPE.

La conferéncia de decision publicarà, al mes de julh, la tièra dels calandrins admeses en annada d'APRENE 1 per la rintrada seguenta.