«L’immersion en occitan aplanta una situacion-problèma plan interessanta : parlar una lenga dominada qu’es tanben a l’encòp la lenga ensenhanta … Dobrís oficialament la pòrta de l’escòla als aprendissatges non-conscients ! » Felip Hammel
Immersion e aprendissatges non conscients :
« Cossí s’aprenguèrem de parlar a la començança de la vida nòstra? »…
Pòdi pas descriure cossí m’aprenguèri de parlar. Quitament de marchar…Podèm pas descriure ni explicar cossí las idèas nos venon. E, pels professionals de l’ensenhament que sèm, per l’escòla en occitan que fasèm, aquel afar es important: impòrta. Tant val dire qu’es de consequéncia. D’aitant mai que la volèm ajudaira al pus mai pels mainatges, aquela escòla en occitan. Mancam encara de responsas scientificas aquí dessús, de segur, mas n’avèm unas, pr’aquò. Las anam avisar a la seguida.