|
|
Nòvaletra n°10
Julh de 2024
|
D'esitar pas d'espandir la difusion als parents !
|
|
|
|
|
|
|
|
Sant Joan a Montpelhièr
|
|
Dissabte 22 de junh, nivolas grisas e pluèja intermitenta empachèron pas las calandretas montpelhierencas de festejar la Sant Joan, o Solsticium coma la sonam tanben, dins l'encastre del Total Festum, festenal de las lengas occitanas e catalanas organizat mercé la Region Occitania.
|
|
L'associacion culturala Inter'Cal, animada pels parents dels establiments primaris e segondaris Calandreta de Montpelhièr, organizèt una fèsta de las polidas, amb tres concèrts remirables de Krin-Krin, Nux Vomica, e La Mal Cofada. La pluèja faguèt partir qualques familhas, mas los mai corajoses demorèron per assistir an aqueles doas darrèras performàncias ... mercé tanben als avitalhaments porgits per l'estanquet dels parents benevòls ! Entrepans de polet marinat, de farçós, ensaladas de melons e pastècas, còcas sucradas e saladas, siròps, e cervesas de primièra permetèron a tot aquel brave monde de luchar contra los elements e assegurar l'ambient festiu !
|
|
Nòstres calandrons sautèron lo fuòc (de papièr crespon), a la fin d'un polit ritual dels elements de la Sant Joan. Un brave moment mirgalhat e benvolent, que los mai grands ajudèron los mai pichons de s'eslançar per sautar !
|
Un clinhèt e un mercejament a la Dalfina de Pesenàs que menèt lo talhièr Sant Joan al Congrès passat, e que nos ajudèt bravament d'aprestar aqueste ritual, demest una fin d'annada totjorn plan comola.
|
Rendetz-vos lo 16 de novembre per Martror !
|
|
Nicolau Miard per Inter’Cal e Calandreta Candòla
|
|
article redigit en occitan lengadocian
|
|
|
|
|
|
|
|
Explicar e defendre l'immersion
|
|
De la mairala au segondari Calandreta practica l'immersion. Aqueste mot pro abstrach s’amerita d'èsser explicitat. Vejam. Quora nos peta d'anar a la mar o a la piscina disèm pas qu'anam far d'immersion mas nadar.
|
|
De fach immersion vòl dire practica incontornabla. Atau immergit dins l'aiga, nadar es indefugible a pena de se negar. Ne va tot parièr per un viatge d'immersion lingüistica, es per far necessitat absoluda d'utilizar la lenga.
|
|
Es aquò que fa aitant que pòt Calandreta per la plan bona rason que l'utilizacion d'una lenga es condicion absoluda per la conéisser es a dire la saber parlar.
|
|
Atal l'immersion es complementària e diferenta de la pedagogia coma es tot bèl just marcat dins la Carta Calandreta.
|
|
Per una lenga sens la practica res va pas. Tot parièr ensenhar d'annadas la bicicleta (istoric, compausantas, estiles...) sens jamai l'utilizar donarà de resultats desastroses. Idem de nadar sens se banhar.
|
|
L'avèm oblidat mas sèm totes enfants de l'immersion.
|
|
Es amb ela qu'aprenguèrem tots a parlar abans d'anar a l'escòla, e atau de saber causas complicadas : un enfant de 3 ans fa de subjontius acordats. Per aquò fargam a la Calandreta las condicions d'aqueste exercici permanent de parlar l'occitan.
|
|
Puèi s'apren de legir que per aquò cal un ensenhament. Mas saber parlar una lenga es sonque amb son usatge. E aquò capita d'un biais infalhible.
|
|
Èsser contra l'immersion es voler que la lenga siá objècte mòrt. Non parlada, sonque objècte d'ensenhament e d'estudis. Muts.
|
|
article redigit en occitan lengadocian
|
|
|
|
|
|
|
|
|
|
Lo licèu Leon Còrdas innòva !
|
|
Avèm lo plaser de comunicar a prepaus del projècte de l'establiment Leon Còrdas de Montpelhièr :
|
|
Tre setembre de 2024 un percors teatre serà prepausat !
|
Per descubrir aquela noveltat, metèm a posita lo comunicat de premsa. Per tota questions esitetz pas a contactar l'establiment.
|
|
article redigit en occitan lengadocian
|
|
|
|
|
|
|
|
La Formacion Continua, un exemple de cooperacion
|
|
La Confederacion Calandreta a causit l'establiment APRENE per organizar la Formacion Continua dels regents de las Calandretas e d'un biais oficial, lo burèu confederal del 17 de junh de 2024 ne validèt las proposicions. Aquel programa se bastís en cooperacion amb lo regentum que se trapa a d'unes moments, a formular de demandas precisas, e a d'autres, a prepausar de contenguts. D'aqueles escambis, naisson de proposicions plan diversificadas que respondon als desirs e a las demandas de cadun. Dins lo paisatge educatiu actual, la proposicion de Calandreta sembla un vertadièr OVNI. Quora la formacion continua se redusís d'en pertot, lo movement nòstre causís de ne faire un enjòc prioritari e podèm mesurar cada an que lo regentum lo considèra aital. Per l'annada 2024-2025, pas mens de 37 formacions son prepausadas. Lo programa complet e detalhat serà al sit d'Aprene tre la fin del mes de julh. Del temps de las pre-dintradas los caps d'establiments convidaràn los collègas a causir las accions que vòlon seguir. La dinamica baissa pas e sembla amai de s'afortir e ne podèm èsser contents !
|
|
article redigit en occitan lengadocian
|
|
|
|
|
|
|
|
De bonas vacanças ?...benlèu !
|
Aqueste debuta de julh marca pels establiments la debuta de las vacanças ! Ongan la debuta d'aquel periòd çaquelà esperat, comença plan curiosament amb una eleccion inedita e plan perilhosa per nosaus ! Lo scenari èra pas tot a fait al programa, coma diriá l'autre, mas ne sèm aquí...Sabèm dempuèi mai de quarante ans que tota eleccion es succeptibla de tornar metre al debat la question de las lengas regionalas e, totjorn per experiéncia, sabèm que cada alternància entraïna de consequéncias pesugas pel nòstre rasal. Novèls venguts, novèls interlocutors, novèls a priòris... A cada còp cal tornar prene son baston de pelegrin e tornar faire de pedagogia... Explicar, justificar, convéncer, encara e totjorn, rassegurar a prepaus de las nòstras causidas linguisticas e pedagogicas, sens desbrumbar de desmargar los discors falsièrs... Dire que la passa convida a la prudéncia sembla pas exagerat e nos caldrà plan gardar un uèlh sul gat e un autre sus la caissa de peis ! Dins aquel revolum, Calandreta deu faire mèfi a sas plumas. Nos caldrà plan trapar temps per se pausar e bufar un pauc mas es pas ora. Sèm observators d'un mond que s'esquiça e, dins lo meteis temps, sèm actors d'un movement que defend de valors e de principis. Mai que jamai benlèu nos caldrà èsser solidaris e persuasius que dintram dins un periòd de fòrtas turbuléncias.
|
|
article redigit en occitan lengadocian
|
|
|
|
|
|
|
Totas las nòvaletras son a posita al Forum Calandreta. Serà possible de reagir als articles.
Los qu'an pas accès a aquel forum poiràn mandar lors reaccions a las adreças çai-jos.
|
|
|
|
|
|
|
|
|
|
