Davalada de 2020

Formacion iniciala

Capitèrem de far en presencial los primièrs estagis e los primièrs moduls dels estagiaris en APRENE1 e en PEE.

Per nosautres èra indispensable : dubrir lo mond a la pedagogia Calandreta non se pòt pensar sens que las personas s’encontren, se freten als lòcs, a las còlas, als mainatges,...

L'escòla a distància es pas l'escòla vertadièra.

Abonaments revistas

Fa qualquas annadas que APRENE e la Confederacion Calandreta ajudan l'edicion occitana que malauteja per manca total de sostenh institucional mas tanben social. Visquèrem amb la disparicion de Papagai e Plumalhon lo viude sideral que representa aquela pèrda.

Per vos abonar :

• Lo Gai Saber

• OC revista

• Reclams

Jornal

Es una costuma a Aprene ! Cada annada los Calandrins en primièra annada de formacion son cargats de redigir e difusir un jornal de còla. Aquel jornal es fargat a l’escasença dels estagis, que se fan a l’establiment Aprene, mai o mens un còp lo mes.

Totes los jornals, dempuèi lor creacion son a posita al sit d’Aprene.

A la prima passada, pr’amor del primièr embarrament las calandrinas se deguèron adaptar e prepausèron una version numerica de lor jornal Shiula Floreta…

Ara lo plec es pres, la version numerica es adoptada e la còla novèla encadenèt amb la publicacion de Jorn’9 ! 

Master

Lo seminari Master qu'èra previst a Besièrs se debanèt a distància del 19 al 22 d'octòbre. Permetèt als professors de l'universitat de Corte e als paissèls-ajudaires d'APRENE de trabalhar amb las 12 estudiantas e estudiants a cavar las problematicas de recèrcas.

Encara un còp, verificam la pertinéncia de la praxis a l'òbra a Calandreta e a la Bressola : regentas e regents son de practicians pedagogics, e s'apodèron las aisinas scientificas per questionar çò que se passa dins las classas, alentorn de tematicas plan ricas : transmission inter-generacionala, cenchas al collègi, lengas de França a la mairala, dintrada dins lo conselh, creacion d'albums, fèstas tradicionalas, plans de trabalh, construccion del genre, comportaments auto-centrats, plan manjar a l'escòla, immersion e ortografia francesa...

ESTABLIMENT D’ENSENHAMENT SUPERIOR OCCITAN APRENE
Ostal de la Vida Associativa – Boita n° 116 - 2 rue Jeanne Jugan 34500 Besièrs
Telefòn 04 67 28 75 36 –  aprene@aprene.org - https://aprene.org