Dintrada de 2018

---

 L'ISLRF convencionèt amb l'ESPE de Corsega

Dempuèi la creacion de las Escòlas Superioras del Professorat e de l’Educacion (ESPE), l’ISLRF e APRENE se cèrcavan un partenari vertadièr per la formacion dels regents dels malhums immersius. Una convencion foguèt signada pel breton entre l’ESPE de Bretanha e l’ISLRF mercés l’ancian president de region e ministre Le Drian ; lo tancatge demorava per las autras lengas.

Aquesta marrida passa s’acaba aqueste 5 de septembre de 2018 amb la signatura a Corti d’una convencion de partenariat entre l’ESPE de Corsega, l’Università Pasquale Paoli e l’ISLRF.

Aquela convencion amb Corsega se marca dins la seguida de la de Perpinhan e permet de tornar trobar lo vam d’aquel camin e d’aver una maqueta que ten compte de l’especificitat de l’immersion.

Ongan 3 lengas son concernidas (alsacian/moselan, catalan e occitan) e 16 estudiants son inscriches en master. En octòbre 10 professors de l’ESPE de Corsega vendràn a Besièrs per un seminari de formacion amb totes los estudiants e los professors de l’ISLRF/APRENE. Tornaràn al moment del Congrès dels 40 ans de Calandreta a Quilhan. Ligam cap a l'article complet

---

De l'ensenhament de lengas a l'educacion plurilingüa

 APRENE contunha la collaboracion amb la Societat Catalana de Pedagogia que ven de mai en mai fruchosa : lo Termomètre lingüistic evoluís amb l'experimentacion de 4 grilhas d'observacion de la lenga orala, de 3 a 6 ans. Quatre paissèls-ajudaires anèron visitar d'escòlas en Catalonha. Los collègas Catalans venguèron veire las Calandretas. Aqueles escambis s'intensificaràn ongan. Una trobada es prevista en debuta de 2019 a Prada en Catalonha nòrd, a prepaus de practicas plurilingüas e d'avaloracions de lenga. Ligam cap al sit de la SCP

---

Lo portfolio del regent

De mai en mai de regents se marcan per aver accès al nòstre NAS (Netword Attached Storage). Lo trabalh menat pels paissèls-ajudaires a prepaus del portfolio de regent(a) de Calandreta es ara plan avançat. Aquela aisina cooperativa serà una brava ajuda  per exemple pels rendètz-vos de carrièra. La primièra formacion per ajudar los regents a fargar cadun son portfolio se farà lo dijòus 18 d'octòbre de 9h a 17h dins los locals d'Aprene. Serà possible de la seguir a distància. 

Las demandas d'accès al NAS se fan per messatge electronic a contact@aprene.org.

---

Formacion LSU Saqueta

Dimècres 10 d'octòbre de 14h a 17h ajudarem los regents e caps d'establiments per utilizar lo logicial Saqueta que foguèt causit per la Confederacion coma supòrt del Libret Escolar Unenc.

Serà possible pels regents de participar a distància. Aquela jornada es un primièr pas, dins l'espèra de poder metre en plaça una ajuda en region.

---

ESTABLIMENT D’ENSENHAMENT SUPERIOR OCCITAN APRENE
Ostal de la Vida Associativa – Boita n° 116 - 2 rue Jeanne Jugan 34500 Besièrs
Telefòn 04 67 28 75 36 – Telecòpia 04 67 28 75 39 - aprene@aprene.org - https://aprene.org