Prima de 2019

---

Las inscripcions a la jurada son dobèrtas !

La jurada ? Aquò es l'examèn que i a per intrar en formacion per dire de far d’ensenhaire(a) a Calandreta, al primari o al segondari.

L’inscripcion se fa en linha a partir del sit aprene.org

Sul sit de l’establiment d’ensenhament superior APRENE, trobaretz totas las entressenhas per ne saupre un pauc mai a prepaus d'aquesta formacion intensiva e exigenta que mena al mestièr de regent o de professor a Calandreta. Formacion qu'es indispensabla. L’establiment APRENE ten ara pro d’annadas d’experiéncia e sas formacions son plan conegudas e reconegudas. A la capacitat de formar lo mond al mestièr d'ensenhaire en immersion e de preparar los transmeteires de la lenga occitana de deman.

La pedagogia cooperativa de dobertura multiculturala e interlingüistica es al còr de la formacion.

Los candidats an fins al 2 de junh per s'inscriure. Parlatz ne dins las escòlas e a vòstre entorn.

---

Lo congrès dels 40 ans del movement Calandreta se debanarà a Quilhan dins Aude del 30 de mai al 1ièr de junh.

Serà l’escasença d’escambiar per anar cap a la definicion de la pedagogia Calandreta. Aquò se farà demercé 5 talhièrs

* Immersion : sortir del monolingüisme

* Familhas de Lengas : educar al plurilingüisme

* Calandreta aculhís mainatges e joves, e pas soncament «d’escolans»

* Sortir : malhar amb l’environament

* L’enfant, actor de sos aprendissatges

Lo dimècres 29 de mai, totes los regents son convidats a la jornada confederala dels ensenhaires.

O cal pas mancar, encartatz-vos al mai lèu !

 Consultar lo programa complet.

---

Convidar lo conte en classa...

Ongan, aprigondissèm lo partenariat amb lo Cirdòc a l’entorn del biais de far viure e de trasmetre contes, legendas e mitologia en classa.

Manquetz pas las 2 jornadas que demòran lo dijòus 16 de mai e lo dimècres 12 de junh.

 

Aquel dimècres 12 de junh i aurà tanben la presentacion dels projèctes a mira cooperativa dels regents e dels professors que clavan lor formacion iniciala : 4 pel primari e 3 pel segondari.

Coma un pas dins lor camin linguistic e pedagogic, nos presentaràn la frucha de lor trabalh e de lor recèrca.

---

Cada 2 ans lo collòqui ISLRF nos balha l'escasença bèla de far lo ponch a prepaus de las darrièras recèrcas pel domeni de la pedagogia e de l'immersion.

Aqueles collòquis son dobèrts a totes : ensenhaires, especialistas e scientifics, cercaires, mas tanben parents e associatius dels movements d’ensenhament de las lengas dichas regionalas en immersion. I vivèm a cada còp d’escambis d’una granda riquesa amb los collègas alsacians, bàscols, bretons, e catalans. Ongan Seaska e las Ikastolak alestisson lo collòqui a Baiona los 18 e 19 d’octòbre de 2019.

 Mai d'entressenhas sul sit internet islrf.org

---

ESTABLIMENT D’ENSENHAMENT SUPERIOR OCCITAN APRENE
Ostal de la Vida Associativa – Boita n° 116 - 2 rue Jeanne Jugan 34500 Besièrs
Telefòn 04 67 28 75 36 – Telecòpia 04 67 28 75 39 - aprene@aprene.org - https://aprene.org