|
|
Nòvaletra n°7
Abril de 2024
|
D'esitar pas d'espandir la difusion als parents !
|
|
|
|
|
|
|
|
Agenda escolara en occitan
|
|
Quand prenguèri la classa de CM pel primièr còp, en setembre de 2016, me semblèt que mancava quicòm per perlongar lo banh linguistic de la jornada de classa e far ligam entre escòla e ostal…
|
En fin de jornada, a l’ora de marcar una lectura de far per l’endeman, una poesia d’aprene per la setmana seguenta, o los afars de metre dins la saca per una sortida, me diguèri que seriá ben d’aver una aisina “dins l’esperit de classa”… Es aital que comencèt, per ma classa.
|
|
Coma dins tota agenda, caliá de paginas “linhadas” per i escriure (lo trabalh de far, las causas de desmembrar pas, los afars de portar...) mas pensèri que seriá de biais d’apondre de contenguts ludics e/o culturals : recèptas, bricolatges, poesias, tèxtes...
|
De cants, tanben e comencèri amb “d’incontornables”, tradicionals o pas (Se canta, Cançon de la Copa, De cap tà l’immortèla…). E, per mo·a·s escolan·a·s nimesenc·a·s Antòni Bigot, Aimat Serre, Jòrgi Gròs…
|
Pensèri que seriá de biais de balhar qualques informacions suls jorns feriats : d’ont ven que trabalham pas, aqueles jorns d’aquí ?
|
Coma seguissiái alara lo trabalh dels collègas cap a “familhas de lengas”, sosquèri a una plaça dins l’agenda : quicòm que lo·a·s escolan·a·s se poirián apoderar sens preséncia d’un·a regent·a. Me semblèt que de recèptas de cosina poirián far.
|
|
Per l’anecdòta, comencèri una maqueta dins lo temps de las vacanças d’estiu, abans de prene la classa de CM. Mas, lo darrièr jorn, al moment de recaptar, lo disc dur extèrn que portava lo sol enregistrament d’aqueste trabalh, de paur benlèu de dintrar dins lo cartable, aguèt l’idèa de prene son envòl, de traversar lo burèu e de se fracassar al sòl…
|
Me calguèt esperar qualques meses mai tard per i tornar pensar ;-)
|
|
Entre temps, m’èri mainada que lo fotocopiador de l’escòla poiriá de segur sortir las còpia, mas cossí far puèi per las religar de bon biais : aver una aisina que tenga l’annada (dins un cartable d’enfant !) e que faga polida figura ?
|
|
Passar per una estampariá professionala per una sola classa, èra pas pensable. Tant valiá far la crida als collègas, benlèu d’une·a·s seriàn interessat·da·s ?
|
|
article redigit en occitan lengadocian
|
|
|
|
|
|
ISLRF e ESKOLIM
Qu'es aquò ? Qu'es aquò ?
|
|
L'ISLRF foguèt creada en 1996 a l'inciativa de Joan Loís Blenet et Felip Hammel per respondre a la necessitat d'afortir los diferents rasals lançats dins l'aventura de l'immersion. Caliá un establiment superior per federar las lengas regionalas entre elas d'una part e per legitimar d'autra part la possibilitat de faire de formacion iniciala. En mai, s'ajustèt l'acompanhament del regentum sul camin de la titularisacion o encara dins los parcors MASTER. Notarètz, que la denominacion de l'ostal, Institut Superior de las Lengas de la Republica Francesa, manca gaire de sal quora sabèm la granda consideracion que la nòstra Republica pòt ofrir a las lengas e culturas regionalas. l'ISLRF es en ligam amb lo ministèri de la recèrca e lo de l'ensenhament. Aquela particularitat fa que l'ISLRF anima tanben la reflexion a prepaus de l'immersion de mercé la tenguda de collòqui cada dos ans, e en 2025, serà en occitania !
|
|
ESKOLIM federa uèi los sièis rasals que desvelopan l'ensenhament immersiu en França mas son mestièr es d'animar las grandas discutidas e negociacions amb l'Estat. Lo ministèri de l'Educacion Nacionala, de l'Interior, lo Primièr Ministre o encara lo President de la Republica son doncas regularament interpellats a prepaus de las questions essencialas : demanda de mejans, demanda d'estatut, proposicion de lei, demanda de cambiament constitucional.....ESKOLIM a clarament una dimension politica e d'al còp un biais d'agir e de comunicar plan diferent.
|
|
Entre L'ISLRF e ESKOLIM los ligams son evidents que son las meteissas personas mas las missions son clarament diferentas dins lo fons coma dins la forma. L'ISLRF a un quotidian d'assegurar quand ESKOLIM mena puslèu d'accions sus una tempora longa que necessita de faire de politica dins lo sens nòble del tèrme. Convéncer d'elegits, n'acompanhar d'autres que vòlon s'engatjar, animar la demanda sociala, rendre vesidor de problematicas realas, interpellar lo governament.....
|
|
En conclusion, e es çò mai important, darrièr de noms un pauc complèxa i a sustot de femnas e d'òmes al trabalh per faire caminar l'immersion dins los nòstres rasals e mai generalament dins la societat tota !
|
article redigit en occitan lengadocian
|
|
|
|
|
|
|
|
|
|
Los 10 ans del Prèmi Literari Calandreta
|
Lo projècte de prèmi de literatura occitana nasquèt en setembre de 2014 amb la volontat de la còla pedagogica tota de la Calandreta dagtenca, ajudadas per la secretària de l’epòca e subretot per la presidenta Virginia Perrin.
|
|
L’idèia venguèt del besonh de far legir los escolans en los motivar a la practica de la lectura amb de tèxtes adaptats a lor nivèl. S'agissía d'endralhar de debats ont la critica d’òbras constituís un supòrt a l’expression orala dels escolans. Mas tanben d'elaborar d’aisinas comunas a totas las Calandretas a l’entorn dels libres legits.
|
|
Los objectius pels escolans èran de desvolopar lo plaser de legir, de descobrir e espandir sas causidas literàrias, en lenga nòstra, d’èsser capable de metre en evidéncia de critèris de seleccion d’un libre per participar a de discutidas argumentadas, justificar o valorar sa causida.
|
|
Lo principi del PLC : legir 4 libres adaptats a son nivèl entre setembre e març. Votar al dintre de la classa amb lo material de vòte, fin de març (bulletins de vòtes, cartas d’electors, fuèlh de comptatge…). Transmetre las resultas que son recampadas e puèi oficializadas lo jorn de la Passejada Literària Calandreta, al mes de mai.
|
|
Una jornada a l’encòp de rescontres e d’escambis entre classas e amb los autors o professionals dels libres occitans marcada per la ceremonia oficiala de la remesa dels prèmis literaris.
|
|
En junh de 2015, per la primièra Passejada Literària que se debanèt al Castèl Laurens en Agde, es Terèsa Pambrun que foguèt seleccionada e causida per ‘’Passejada als quatre vents’’.
|
|
Acceptèt de venir la mairina del Prèmi Literari Calandreta. La vòli mercejar : es una fada que fa nàisser d’arcolans. N’aprofièchi per saludar d’autres autors e afogats del Prèmi que comencèron amb nosautres lo camin e que o contunhan.
|
|
Pòdi pas doblidar de parlar del CIRDOC amb Joana-Maria VAZELLE e sa còla de collègas que desempuèi la tota comencança nos sosten al nivèl pedagogic e financièr. Puèi totes los ostals d’edicion pichòts e independents que son d’Occitania tota qu’ensajam de far viure.
|
|
Las amistats, los rescontres, las descobèrtas, la dobèrtura : es una istòria, un projècte partejat tanben amb las bibliotecàrias quand avèm l’astre de n’aver dins d’unas calandretas.
|
|
N’aprofièchi per mercejar la federacion 34 e la Confederacion que nos permet de difusir lo material pel projècte e que nos acompanha tanben financièrament pel Prèmi e per la Passejada.
|
|
Saludi totes los regents que gausèron prene en carga las jornadas de remesa dels Prèmis .
|
|
Torni dire, encara un còp, un plaser partejat comol d’escambis e de dobèrturas…
|
|
Saludi l’implicacion dels collègas dels collègis e ara del licèu.
|
|
Existís desempuèi la debuta del PLC un prèmi literari adultes, a l’iniciativa del « Cranc de Massilhan ».
|
|
Ai de vos informar tanben qu’existís un ‘’Premi del llibre vivent’’ a l’imatge del nòstre Prèmi Literari Calandreta qu’espeliguèt aprèp lo nòstre e que sembla fòrça seguit en Catalonha.
|
|
Per acabar, es l’escasença per ieu de far un còp de publicitat per la formacion ‘’Literatura de joinessa en occitan’’ que se ten al CIRDOC desempuèi doas annadas sus 4 dimècres. La tòca de la formacion : de temps d’escambis, de creacions d’aisinas didacticas e de material pedagogic a l’entorn dels albums de lectura occitans, ligats a las òbras seleccionadas del Prèmi Literari. Un mejan de recampar de material e de se balhar d’idèias e de vam per tornar dins las classas amb de motivacions novèlas. Atal, rescontrèrem Martina Prévot de las edicions ‘’Edite-moi !’’, l'autora Caròla Bessière, e tant d’autres professionals del libre.
|
10 ans ja, d'una polida aventura rica e estrambordanta, aquò se festeja !
|
|
Anna-Laura Tobena, referenta del PLC
|
|
article redigit en occitan lengadocian
|
|
|
|
|
|
Aisinas informaticas a posita
Dins nòstra quista constanta d'ofrir d'espleches a l'encòp innovants e alinhats amb los principis de libertat e d'autonomia numerica, APRENE es fièr d'anonciar lo lançament de mantun servici concebut especificament per facilitar vòstre trabalh quotidian e vos ofrir d'alternativas liuras a las solucions comercialas :
|
-
|
Send : Nòstra responsa liura a WeTransfer, garantissent un transferiment de fichièrs securizat. Lançatz vòstres mandadisses sus send.aprene.org.
|
-
|
StirlingPDF : Per respondre a totes vòstres besonhs en matèria de gestion de PDF, aquel esplech es inspirat per la simplicitat e la polivaléncia d'iLovePDF. Descobrissètz sas foncionalitats sus pdf.aprene.org.
|
-
|
Escalidraw : Perfèit pels que desiran organizar lors idèas amb l'ajuda de cartas mentalas e de diagramas, accessible en linha sus draw.aprene.org.
|
-
|
Wekan : Nòstra plataforma de gestion de projèctes, simple e intuitiva, similara a Trello, per organizar vòstres projèctes amb benaise. Exploratz-la sus wekan.aprene.org.
|
-
|
Nextcloud : Melhoratz vòstra capacitat a collaborar e partejar de fichièrs amb nòstra solucion d'estocatge securizada e privada, accessibla sus nextcloud.aprene.org.
|
Aqueles servicis son entièrament liures d'accèsses e cadun pòt crear son compte d’un biais autonòm, afirmant nòstre engatjament de cap a la libertat numerica e l'autonomia dels utilizators.
|
Sèm convençuts qu'aqueles espleches portaràn una valor aponduda significativa a vòstre trabalh quotidian, en facilitant la collaboracion, la gestion de projèctes, e lo despartiment d'informacions dins un environament securizat e respectuós de la confidencialitat.
|
Se de novèls servicis son aponduts, vos tendrem informats dins las nòvaletras futura. Vòstre retorn es egalament preciós per nos ajudar a melhorar e a alargar nòstra ofèrta de servicis.
|
article redigit en occitan lengadocian
|
|
|
|
|
|
|
|
Patrimòni doblidat
|
Patrimòni viu en grand perilh, l'occitan necessita d'investiments per gardar d'avenidor. Coma tot patrimòni.
|
|
Ongan encara, la celebracion dau patrimòni d'aquesta dimenjada ne doblida un. Es pasmens capitau per la nòstra region, s'agís de l'occitan e dau catalan, doas lengas istoricas e autoctònas dau país. A mai, aquel qu'es viu es gaireben lo sol de marcat dins la Constitucion : «Las lengas regionalas apartenon au patrimòni de França » (Art75-1). Amb tan d'onor imaginariam de valorizacion. Que nani ! Autra originalitat es declarat en « Grand Dangièr de desaparicion » per l'autoritat mondiala pel patrimòni, l'UNESCÒ. L'urgéncia dau perilh deuriá mobilizar. Que d'alas ! Autra singularitat, los credits per aqueste patrimòni viu comptan pas en investiment per las institucions. Aquel patrimòni constitucionalizat compta pas coma patrimòni. Solas las pèiras e los tèules i son. Demòran tancats a la reconoissença patrimoniala dau segle 19en. De segur atau nos preservan de las brutalitats dau cambiament. Aquò empacha l'investiment e penaliza d'a fons aquesta riquesa nacionala menaçada. Argumentan per aquò que las règlas comptablas o permeton pas. Coma se las podián pas cambiar, las règlas. Pròva bèla n'es que, innovacion totala, van intrar dins los comptes la carga de carbona. Vesèm que n'i a qu'an comprés que per sauvar la planeta cal cambiar las règlas. Es tot parièr per sauvar l'occitan.
|
article redigit en occitan lengadocian
|
|
|
|
|
|
|
Totas las nòvaletras son a posita al Forum Calandreta. Serà possible de reagir als articles.
Los qu'an pas accès a aquel forum poiràn mandar lors reaccions a las adreças çai-jos.
|
|
|
|
|
|
|
|
|
|
