|
|
Nòvaletra n°6
març de 2024
|
D'esitar pas d'espandir la difusion als parents !
|
|
|
|
|
|
|
|
Los juntaires del movement Calandreta
|
|
Dempuèi 2021, un novèl mestièr associatiu es nascut, lo de JUNTAIRE (jontaire, junhaire, jonhaire ...), es a dire lo que pòrta l'accion de juntar (religar, assemblar).
|
|
Estatutariament lo juntaire fa partida del burèu de l'associacion, es una foncion a despart e entièra.
|
Excepcionalament pòt far partida del CA, pasmens fa besonh, per una foncion eficaça e pertinenta, que siá plan informat de la situacion de son establiment.
|
|
Son ròtle foguèt definit : « far passar las informacions a l'entorn de l'activitat del movement al sens larg : accions culturalas, politicas». Pòt animar lo ponch «movement» previst a cada CA . Aquel ponch pòt concernir l'actualitat del movement (congrès, serada tematica, coordinacion calendari...) mas tanben dels ponches de foncionament (trajècte formacion APRENE, ligams amb los autres rets immersius...).
|
|
Per alimentar aqueles ponches, es util de relevar las informacions confederalas e federalas mas tanben d'aver una bona coneissença de las institucions pròprias a Calandreta, explicar lor rason d'èsser, lor foncionament, los diferents finançaments, lo ligam amb los autres movements de defensas de las lengas regionalas (ESKOLIM, APRENE, PQVNL...).
|
Los salariats de las federacions departamentalas, regionalas e de la Confederacion son disponiblas per respondre a las questions, se n'i a, a prepaus de l'estructuracion del movement. Sul forum, un espaci lor es dedicat per permetre d’escambis entre eles.
|
Convidam los juntaires a doas seradas en visio per an. Aprèp las tematicas «lo ligam amb los elegits», «las aisinas a posita dins lo movement» e «lo camin de formacion dels regents», lo 11 de març totes los juntaires son convidats per parlar del congrès a venir e de sa tematica : FASÈM CULTURA!
|
|
article redigit en occitan lengadocian
|
|
|
|
|
|
|
|
Amassada Generala 2024 de l'ISLRF
|
Lo dissabte 16 de març de tantòst, l'Institut Superior de las Lengas de la Republica Francesa se recamparà en Bretanha dins los locals del collègi DIWAN Penn-ar-Bed del costat de Le Relecq-Kerhuon per i téner sa tradicionala Amassada Generala Ordinària. L'ISLRF es l'ostal comun de totes los rasals imersius en lenga regionala : ABCM Zweispachigkeit pels Alsacians, Bressola pels Catalans, Diwan pels Bretons, Scola Corsa pels Còrses , Seaska pels Bascas e nosautres. L'ISLRF acompanha los estudiants de MASTER, los Professors d'escòlas de totes los rasals e assegura regulament de temps de reflexion e de parucion a prepaus de l'immersion. En defòra del debanament classic d'una Amassada Generala, los participants auràn tanben l'escasença de lançar lo chantièr del 10èn collòqui a prepaus de l'immersion que se tendrà en occitania a la prima de 2025. De notar que la velha de l'Amassada Generala, los tecnicians de totes los rasals trabalharàn entre eles. Un bon biais d'optimisar lo viatge e d'entreténer de relacions amicalas entre de mond qu'an pas totjorn costuma de s'acampar en presencial.
|
|
article redigit en occitan lengadocian
|
|
|
|
|
|
|
|
|
|
Grop de trabalh
|
Jos l'impulsion del Patrici Baccou, diretor d'APRENE, e del Cristòl Causse, encargat de mission d'IPR Occitan, los formators de l'establiment APRENE e las conselhièras pedagogicas departamentalas de Gard, Lozèra, Erau, e Aude bastiguèron un calendièr de rescontres. Aqueles tempses privilegiats, ajudèron per partejar de viscuts diferents a prepaus de las diferentas problematicas per ensenhar la lenga dins las classas, mas sustot, balhèron l'escasença d'imaginar un trabalh comun a destinacion del regentum. Las Palancas retenguèron tota l'atencion de totes, que son lo clòsc d'un ensenhament eficaç de las lengas en comparason. Lo grop de trabalh partiguèt de l'idèa que dins la classa aquel trabalh de palancas se deviá sistematizar de mercé un protocòl simple e recurrent, sens empachar tanpauc d'unes perlongaments, tot particularament dins lo domeni cultural. La causida d'associar dins cada temps de trabalh d'escambis verbals, de recèrcas, de lectura, d'escritura o encara d'emocions, fa sens e pòt pas destorbar los regents que sián començaires o mai experimentats.
|
|
La problematica primièra, que siá dins una classa publica bilingüa, o dins una classa immersiva Calandreta, es de capitar de far parlar los pichons.
|
|
Plan d’aisinas existisson per i arribar, mas lo ròtle d’una regenta o d’un regent deu èsser de questionar aquelas aisinas per comprene çò que se jòga darrièr las situacions d’aprendissatge.
|
|
La lenga, la seuna utilizacion, pòt pas èsser sonque l’objectiu final. Es un subjècte d’estudi a part entièra.
|
|
Practicians que sèm, avisam que questionar lo nivèl de lenga, la qualitat de la lenga, l’interès de trabalhar en comparason de lenga es un afar quotidian.
|
|
Demanda una atencion, una escota particulara a la lenga dels escolans e una autocritica cap sa lenga pròpria e la necessitat de la melhorar de longa, sens culpabilizar tanpauc.
|
|
Totas las recèrcas scientificas pròvan qu’un bilingüisme operacional es pas l’addicion de dos monolingüismes parallèls mas puslèu de transferiments d’aprendissatges lengatgièrs, de longa. ( C.Quevillon 2022)
|
|
Decidiguèrem doncas de prepausar una aisina per ajudar a aquò. L’amira es pas d’apondre encara d’activitats que van rosigar lo temps dedicat a l’occitan. Las competéncias lengatgièras se pòdon trabalhar dins totas las matèrias.
|
|
Aquelas activitats las vesèm coma un biais d’amorçar la pompa e de trabalhar de biaisses, de reflèxes que vendràn puèi d’automatismes.
|
|
« un quart d’ora per ganhar doas oras »
|
|
Es un fichièr per metre en òbra d’activitats de comparasons de lengas conscientas o inconscientas (las palancas), que cadun adaptarà en foncion de la realitat de sa classa.
|
|
article redigit en occitan lengadocian
|
|
|
|
|
|
|
|
|
Sul camin de la lenga
|
En decembre, vos assabentàvem de la virada presa a Calandreta per l’avaloracion de la lenga dels Calandrons : après qualques annadas de vida del dispositiu Camin de Lenga dins l’encastre de la formacion iniciala, lo metèm en òbra dins los establiments escolars.
|
|
Après mantunes rescontres en visioconferéncia per explicitar al regentum aquel biais d’avalorar la lenga, avèm lo plaser de constatar l’adesion d’un grand nombre de classas, malgrat lo temps comptat e la noveltat, per aquela annada de transicion.
|
|
A l’ora d’ara, mai de la mitat dels establiments s’es endralhat sul Camin de Lenga Calandrons e quasiment lo meteis nombre a ja causit una persona «pagelaira». Estelum (l’ENT d’Aprene) s’es enriquit d’un dorsièr «Portfolios-Calandrons» e los referents CdL an aprestat mantunas aisinas : grilhas, fichièrs, tutorials. Es un trabalh dels bèls de mesa en plaça ongan !
|
Segur qu’i aurà causas a melhorar. Lo congrès venent serà una polida escasença per prene lo temps d’escambiar aquí dessús e far evoluir lo dispositiu.
|
|
Ongan encara, de calandrons quitaràn l’escòla amb lor diplòma de certificacion de nivèl A2 en lenga occitana en las escòlas e de nivèl B1 al collègi.
|
article redigit en occitan lengadocian
|
|
|
|
|
|
|
Formacion al segondari
L'establiment d'ensenhament superior APRENE experimenta a la demanda de l'establiment Calandreta Leon Còrdas e a l'aflat del conselh confederal de la formacion al segondari, una experimentacion de formacion segondari.
|
Tres jornadas banalizadas permetràn de s'acarar a elaborar de responsas a la question de « Cossí trabalhar al segondari amb los espleches de la pedagogia Calandreta ? » .
|
Lo 26 de febrièr de 2024, 28 professors e salariats del collègi e Licèu Leon Còrdas se son trapats per una primièra jornada de formacion dins los locals de la Confederacion Calandreta.
|
Tres co-directors d'APRENE animèron aquela jornada que faguèt alternar de moments en grop bèl e en còlas pichonas.
|
|
Un ponch sul conselh permetèt d'endralhar un trabalh cap a aquel luòc d'elaboracion collectiva de la lei al collègi.
|
|
De botigas dubriguèron lo talh de talhièrs d'escritura.
|
Cada estagiari a un espaci portfolio dubèrt a Estelum que permet de depausar cv, atestacions, diplòmas e produccions que rendràn compte dels camins de lenga e de pedagogia. Lo referencial portfolio permet de saupre qué depausar.
|
La formacion deurà sortir de produccions que faràn viure al grop un foncionament cooperatiu : aprene en immersion per la pedagogia tal coma per la lenga.
|
|
article redigit en occitan lengadocian
|
|
|
|
|
|
|
Totas las nòvaletras son a posita al Forum Calandreta. Serà possible de reagir als articles.
Los qu'an pas accès a aquel forum poiràn mandar lors reaccions a las adreças çai-jos.
|
|
|
|
|
|
|
|
|
|
