|
|
Nòvaletra n°2
Novembre de 2023
|
|
|
|
|
Jòc Vidèo Dordonha
|
Aquesta nòvaletra es tanben l’escasença de menar un pauc de lenga, de cultura occitana dins totes los ostals ont es difusada.
|
|
Aprèp lo jòc d’escapa de Nimes, un jòc vidèo dins Peirigòrd, «Dordonha». Los creators independents d'aqueste jòc "made in France" faguèron una causida unenca per l'ora : un jòc «tot en òc» tèxtes e voses. La traduccion es de Danís Chapduelh. Cédric Babouche (Un Je Ne Sais Quoi), Aymeric Castaing (Umanimation) e la còla dels creators vos convidan a la descobèrta del patrimòni peirigordin. Un viatge per de païsatges tot en aquarella, l’escasença d’una passejada en familha (un pòt jogar e los autres se regalar de gaitar), sus las traças de Mimi, una femna que tòrna drolleta a travèrs sos sovenirs d'aqueste país.
|
|
Vos encoratjam a viure de moments partejats, a un ritme lent, diferent d’unes jòcs-vidèos fòrça coneguts, dins las colors e la musica d’un tròç de la nòstra cultura.
|
Lo podretz trobar aisidament per quicòm coma 20€ sus ordinador o diferentas consòlas.
|
|
article redigit en occitan lengadocian
|
|
|
|
|
|
|
|
|
|
Formacion Continua
|
|
Lo programa de formacion continua deus regents de Calandreta per l’annada escolara 2023-2024 qu’ei aviat ! Un còp mei, l’auhèrta qu’ei variada dab un catalòg de mei de 40 formacions en mantuns maines : didactica, pedagogia, numeric, lenga e cultura, seguretat, especificitat deu movement.
|
|
Que devem aquera riquessa aus regents qui responón a l’aperet a projèctes en prepausar formacions. Lo programa que’s tròba suu siti d’APRENE e los regents qu’an accès au calendari detalhat via l’ENT Estelum (lòc de paratge e cooperacion enter regents, que sian titulars o en formacion). Uei que comptam mei o mensh 180 inscripcions. Qu’anóncia ua annada chucosa en produccions, pensadas e escambis.
|
|
Qu’ei aquesit despuish bèra pausa que lo mestièr de regent demanda de se formar tot lo long de la vita de tribalh. Que’ns formam tà desvelopar competéncias navèras qu'imaginam pertinentas peus mainatges, e que’ns formam tanben entà ahortir lo camin de pedagogia personau noste.
|
|
La formacion continua qu’a ua dimension cooperativa qui participa a l'espandiment de cadun. Apréner, e préner plaser, ne s’opausan pas ; qu'ei çò qui ensajam de botar en òbra dens la classa, cada dia, entaus mainatges. Aquera formacion continua qu’ei unenca e, dens lo paisatge educatiu actuau, que sembla un tesaur dont podem causir los contienguts com los cutorns, au mei pròche deus besonhs. Mercés a tots de la har víver com ac hasètz e au plaser de s'i encontrar.
|
|
article redigit en occitan gascon
|
|
|
|
|
|
|
|
Clip Arab'Oc
|
Lo projècte Arab'òc es pilotat dempuèi d'annadas per l'associacion Audenca 11Bouge.
|
Los dos artistes associats, Jocelyn Papon e Abdel Bouzbiba, ne pòrtan tota l'èime e fan viure als mainatges aquela alteritat d'un biais simple e sincèr.
|
|
|
|
|
|
|
|
|
|
A prepaus d'avaloracion
|
Avèm l'obligacion de far passar las avaloracions de CP e CE1, pasmens devon èsser utilas e devon pas metre los mainatges en dificultat en causa del nòstre caractèr pròpri.
|
|
En matematicas e lenga las consignas son balhadas en occitan tal coma o fasèm de longa per manténer los calandrons dins una situacion normala de classa.
|
|
Lo tèxte per la fluença es l'un dels exercicis ont los mainatges son lo mai meses a mal en causa del nòstre caractèr pròpri (ensenham primièr a legir e a escriure en occitan e doncas an pas començat o a pro pena, pels CE1, d'aprene de legir en francés).
|
|
Prepausarem un tèxte de fluença en occitan pels CP e CE1 que permeta d'avalorar la fluença d'un biais juste pels calandrons.
|
|
Pel autres items farem de preconizacions cap a las responsas fachas e lor notacion.
|
L'annada es plan començada, es temps, se o avètz pas encara fach, de passar a l'annada novèla per Saqueta. Rampelam qu'es una causida confederala e que la Confederacion paga l'albergament d'aquel logicial que nos permet de gardar la man cap a l'avaloracion dels calandrons.
|
|
De qu'avèm a far en debuta d'an ?
|
- Causir los periòdes d'avaloracion (semestrals o trimestrals), dins LSU e far correspondre dins Saqueta.
- Metre al jorn las classas, los calandrons, lors responsables e regents dins Saqueta aprèp o aver fach dins ONDE (enfants e responsables) o Siècle (apond los professors e lors classas).
- Anar verificar dins Saqueta los professors, metre a jorn las sortidas e intradas dins lo personal que pòt avalorar (regents mas tanben ajuda d'educacion, bibliotecaris,...)
- Crear los grops que fan de besonh (totes los enfants d'un nivèl per exemple per far foncionar las cenchas) en mai de las classas (se fasètz de multinivèl, cada nivèl d'una classa es considerat coma una classa).
- Ligar los professors a las classas e als grops. Metre de professors principals se fa mestièr.
- Ligar las classas e los grops als periòdes causits per LSU e Saqueta.
|
- Metre en plaça las avaloracions jos forma de cenchas en anar quèrre las cenchas prepausadas. Recuperar se las avètz salvagardadas l'annada d'abans las donadas pels CE1 CE2 e CM2 (CP e CM1 càmbian de cicle).
|
E vaquí sètz prèstes per l'annada !
|
Vos rampelam que los tutorials per començar amb Saqueta son a posita a Estelum : 2 endreches dins Aisina :
-> Avaloracion > LSU-Saqueta
-> Informatica > Saqueta
|
|
article redigit en occitan lengadocian
|
|
|
|
|
|
|
|
Punt de vista
Confòrt o inconfòrt, o los dilèmas de la formacion dels regents a Calandreta.
|
|
Quand installam una formacion iniciala per faire de regent nos podèm totjorn demandar quinas son las condicions mai bonas per menar los estagiaris sul camin de la capitada de la dita formacion.
|
|
Aquelas condicions que sián financiàrias, materialas, intellectualas o encara afectivas auràn de segur una influéncia sul viscut, coma sus la resulta, dels estagiaris.
|
|
Metre d'estudiants dins de condicions materialas agradivas pertòca la futura formacion. Desliurats d'una cèrta forma de precaritat, podèm pensar que seràn plan mai disponibles.
|
|
Considerats, la formacion fa l'escomesa que seràn investits e actors de lor formacion d'un biais natural e sanitós.
|
|
Aquel postulat empacha pas qu'una formacion se pòt pas bastir unicament sus las condicions d'acuèlh e de bons tractaments de sos estudiants e las consideracions materialas pòdon pas èsser lo clòsc d'una formacion. Legir la seguida....
|
|
|
|
|
|
|
Totas las nòvaletras son a posita al Forum Calandreta. Serà possible de reagir als articles.
Los qu'an pas accès a aquel forum poiràn mandar lors reaccions a las adreças çai-jos. texte.
|
|
|
|
|
|
|
|
|
|
