Quand installam una formacion iniciala per faire de regent nos podèm totjorn demandar quinas son las condicions mai bonas per menar los estagiaris sul camin de la capitada de la dita formacion.
Aquelas condicions que sián financiàrias, materialas, intellectualas o encara afectivas auràn de segur una influéncia sul viscut, coma sus la resulta, dels estagiaris.
Metre d’estudiants dins de condicions materialas agradivas pertòca la futura formacion. Desliurats d’una cèrta forma de precaritat, podèm pensar que seràn plan mai disponibles.
Considerats, la formacion fa l’escomesa que seràn investits e actors de lor formacion d’un biais natural e sanitós.
Aquel postulat empacha pas qu’una formacion se pòt pas bastir unicament sus las condicions d’acuèlh e de bons tractaments de sos estudiants e las consideracions materialas pòdon pas èsser lo clòsc d’una formacion.
La formacion a tanben foncion de faire viure d’unas situacions ineditas e, de còps, perilhosas que lo principi demòra d’aquerir çò que sabèm pas faire o çò que coneissèm pas encara.
I a doncas una part incèrta, véser insegura, que caldrà plan passar per capitar. Sortir de sa zòna de confòrt permet de se metre en capacitat d’aprene de causas novèlas coma de faire passar al revelator totas sas representacions inicialas en matèria d’ensenhament.
Dins aquel domeni Calandreta s’apièja sus d’unes principis originals que balhan un format e una dimension unenca a la sieuna formacion.
La primièra causida fòrta es de passar mai de temps dins la classa qu’en formacion teorica.
Aital, Calandreta defend e afortís l’idèa que « regent aquò s’apren » e la classa demòra lo luòc unenc ont aquò se jòga. Se i anam pas, en classa, o pas pro, serà dificil d’i portar deman de contenguts, de serenitat e de jòia.
Se lo programa de partença de la formacion pòt atalentar qualqu’un que se vei faire de regent deman, empacha pas que sèm fàcias a de situacions complèxas que cal trabalhar :
-la cooperacion al dintre d’un grop que se coneis pas,
-la co-basteson dels aprendissatges,
-la classa coma espaci perilhós que pòt nafrar,
-la formacion alassa, cal téner fisicament,
-la plaça de cadun dins lo collectiu,
-la còla, l’esperit de còla…
Dins los bilances, los estudiants dison lor patiment d’aver pas agut de condicions financiàrias avantajosas, que los estagis demandan de còps de se desplaçar luènh, que las condicions d’albergament son pas totjorn agradivas, que la carga de trabalh es bravament importanta. Aprene ausís totas aquelas remarcas e criticas.
Dins lo domeni material Calandreta cèrca totjorn de solucions mas sèm gaire ajudats e nos cal faire amb plan mens que totes los autres. I trabalham çaquelà per èsser lèu en mesura d’ofrir de condicions mai agradablas per totes.
Mas los estudiants retenon quicòm mai. Dison tanben, qu’aquela annada los cambièt prigondament, qu’an lo sentiment d’aver ganhat quicòm, qu’an ganhat mai que collègas e que las situacions de cooperacion, amai se pòdon èsser destabilizantas a d’unes moments, son formidablas plan sovent. Paradòxe ultim e recurent desempuèi d’annadas, demandan sovent d’ajustar causas dins la programacion o d’augmentar d’unes volums de corses alara que trapan totes que i a tròp de causas de faire…
Una formacion capitada a coma objectiu de te cambiar en tant que persona. De fait, plan de representacions personalas van èsser questionadas e remesas en causas, d’autras se revelaràn, e d’autras seràn mesas a mal, véser atomizadas…. La situacion cooperativa questiona tanben prigondament los nòstres rapòrts als autres e lo nòstre biais d’èsser personal dins aquelas situacions. Vesèm los autres mièlhs e se coneissèm mièlhs tanben.
La formacion deu faire ganhar de competéncias novèlas dins de domenis precises e, sustot, deu permetre d’augmentar lo capital « fisança » de cadun al punt de li daissar prene una classa en responsabilitat a la dintrada seguenta. Los desirs d’ensenhar s’afortisson, lo camin de regent se dobrís, s’esclairís tanben, emai se bastiguèsse long d’una vida.
Calandreta demòra bravament perfectibla a prepaus dels aspèctes materials mas aquel constat es vièlh de mai de 40 ans. Per contra, Calandreta pòt dire sens vergonha que forma al mestièr de regent.
L’escomesa de deman es de segur de melhorar las condicions per dintrar e seguir la formacion de regent a Calandreta. Caldrà ofrir un camin mai confortable d’un costat mas cal manténer, mòrt e fòl, de situacions cooperativas, inconfortablas, per questionar los desirs e s’assegurar de recrutar de regents qu’an comprés totas las dimensions del projècte Calandreta.
Regent en çò nòstre, es faire mai que la classa. Aquí tanben pòt èsser inconfortable, mas es aquò qu’es esperat dins totes los establiments tant pels caps d’establiments coma pels parents e associatius.
JF Albert