Las regentas e los regents de Calandreta, al dintre de l’establiment APRENE menèrem dempuèi la debuta plan d’experimentacions per avalorar (dins lo sens de donar de valor ) los escolans, e los estudiants.
Lo trabalh en pedagogia institucionala nos butèt de longa a questionar las modalitats d’avaloracion dels calandrins e dels calandrons, e a adaptar tecnicas e institucions.
Avalorar a Calandreta s’inscriu dins aquela dinamica.
Las cenchas
Dempuèi mai de 40 ans, las escòlas Calandretas escolarizan de mainatges de 3 ans fins a 11, sens balhar de nòtas.
Lo sistèma de las cenchas de colors foguèt inventat per Fernand Oury, sul modèl de çò practicat al judò.
Son avantatge principal es d’èsser mai independent del jutjament del mèstre e de metre l’enfant d’un biais plan mai sanitós en responsabilitat de sos aprendissatges. La competéncias de se ganhar dins cada matèria son classificadas dins un referencial, a la disposicion de totes. Cada escolan se pòt entraïnar als exercicis de la cencha d’en dessús, ajudat pels autres e pel regent. Cadun trabalha a son nivèl e a son biais a l’entorn d’una activitat comuna : article pel jornal, escritura de la letra collectiva, recèrca o problèma viscut, mesa al punt del tèxt causit…
Dins una classa cooperativa, qu’escàmbia e produsís, e onte los luòcs simbolics de gestion de la paraula existisson e son questionats e regulats pel responsable de la classa, aqueste biais encoratja l’emulacion e anequelís la competicion. Vòl pel mèstre una autra plaça que la que li es assignada dins l’escòla classica. Lo regent es pas considerat coma l’executaire servile de consignas e de programas que venon d’en naut, mas plan coma responsable de çò qu’engimbra dins sa classa e del contengut de sos ensenhaments, es a dire coma un pratician-cercaire.
Mas las cenchas, sustot, marcan de competéncias que permeton a cadun d’aver de responsabilitats, e doncas d’estatuts, reconeguts per totes e investits dins de tascas, de mestièrs, d’activitats que fan la vida de la classa.
La finalitat de la classa cooperativa de Freinet es pas l’avaloracion. Avaloracion e cenchas servisson al grop classa per mièlhs s’organizar, trabalhar, e doncas grandir dins totes los domenis : disciplinaris, mas tanben, e sustot, psico-afectius e comportamentals.
Lo quasèrn de capitadas
Lo dispositiu de « capitadas » permet la presa en compte del ritme singular de cadun dins lo dispositiu del grop. Illustra perfièchament un concèpte de la Pedagogia Institucionala : L’articulacion dinamica del ieu-nos.
Pels pichonets, la mesa en plaça de las cenchas es mai problematica e lo referencial de còps tròp aluenhat de çò que se passa realament dins la classa.
En mai es plan interessant que la vida del grop pòsca metre en valor los ponches fòrts de cadun a cada moment. La tòca es de relevar las capitadas de cadun, foguèsson pichonèlas, e de las partejar amb los autres.
Lo termomètre lingüistic
L’escòla coma espaci de coneissença e de socializacion dels enfants es un pilar fondamental pel procediment d’aquisicion del lengatge. Regents e calandrons parlan e interagisson cada jorn, partejan d’experiéncias e exprimisson de sentits… Fin finala, se trapan amb d’autras personas e aprenon amassa.
Dempuèi 2014, cada regent en fin de cicle 1 pòt aver una mesura fina del nivèl de lenga dels mainatges de la classa dins l’amira de lo far progressar. Cada regent pòt avalorar la qualitat e lo nivèl de lenga de sa classa mercé a la pròva de competéncia lingüistica (TL) prepausada per la Societat Catalana de Pedagogia e l’establiment d’ensenhament superior APRENE.
La Pagèla
Es una avaloracion somativa referenta per Calandreta. Va indicar un nivèl en lenga-cultura occitana en fin de cicle d’aprendissatge. Pels adultes en formacion, los pagelaires s’apièjan sus un dossièr dedicat de produccions divèrsas : la grasilha de seguit e d’avaloracion dels progrèsses, la biografia lengatgièra, las produccions recentas escrichas e oralas. Prevesèm 15 minutas de paraula, 5 min d’exercicis (lectura, traduccion…), e 10 minutas d’escambi. L’expausat s’articula a l’entorn dels ponches seguent :
– lo somari del dossièr Camin de lenga de son portfolio
– lo document qu’illustra son camin de lenga-cultura occitana
– la grasilha de seguit dels progrèsses
– la presentacion d’un document causit (una produccion significativa, una capitada particulara, quicòm que pòt èsser utile a d’autras personas…)
– Lo bilanç personal e las pistas per la seguida.
A l’eissida, cada avalorator assabenta una grasilha d’avaloracion sus la quala s’apiejaràn los referents del Camin De Lenga per tal de d’estimar lo nivèl de lenga atench. Tres dimensions son atal avaloradas : la fonologia, la correccion de la lenga orala e escricha, la coneissença e l’implicacion culturala.
Per cada capitada APRENE transmet un document certificatiu que ven en aponch del diplòma del DCL.
Lo portfolio dels Calandrons