La recèrca a totjorn fach partida del movement Calandreta e, tre la començança, la formacion iniciala a fach la causida d’associar los contenguts scientifics al costat de la Praxis. En quaranta annadas las escòlas Calandreta son atal passadas d’escòlas experimentalas en immersion, a d’escòlas expèrtas d’aquel dispositiu. Las tecnicas Freinet, e encara mai la Pedagogia Institucionala, fan tanben l’objècte d’una recèrca e de declinasons particularas dins la ret de las escòlas Calandreta. De comunicacions regularas dins de collòquis nacionals e internacionals venon pontuar cada annada l’activitat de l’establiment APRENE qu’es plan regularament sollicitat per far ausir sa votz pertocant la pedagogia, l’immersion o lo plurilingüisme.