|
|
Nòvaletra n°4
Genièr de 2024
|
D'esitar pas d'espandir la difusion als parents !
|
|
|
|
|
|
|
|
Caland’òc 2024
|
|
Aviatz benlèu ja comandat l’an passat lo calendièr «Caland’Òc», plan interessant amb los QR còdis que permeton d’escotar las istòrias ?
|
|
Ongan, l'associacion Caminòc e la Calandreta de Senta Gabèla publican una version novèla del Caland'Òc per 2024, es la quatrena version : un calendari tot en occitan, illustrat a man per de talentoses parents de l'escòla. An causit de metre endavant cada mes una femna occitana : Filadelfa de Gerde, Olympe de Gouges, Azalaïs de Porcairagues...
|
|
Podètz descobrir o tornar descobrir las 12 istòrias d’aquelas femnas.
|
|
Lo calendari es en venda sul sit internet de la Calandreta de Senta Gabèla, al prètz de 12€ l'unitat.
|
|
article redigit en occitan lengadocian
|
|
|
|
|
|
|
|
Una tèsi plan importanta per Calandreta
|
Lo dimècres 20 de decembre, a Montpelhièr, lo public èra talament nombrós per assistir a la defensa de tèsi que calguèt apondre un vintenat de cadièras ! Richard Lopez i presentava sa recèrca, entamenada fa mai de 5 ans, a prepaus de la « construccion de l’identitat professionala dels regents de Calandreta que practican las TFPI e l’immersion en occitan ». I aviá plan de mond de Calandreta, e avián rason. Lo moment èra solemne, coma de costuma dins l’encastre de la venerabla universitat, mas o s’ameritava : èra istoric. Es lo primièr còp qu’un trabalh scientific, seriós, menimós, es publicat a prepaus de nòstre biais de formar regentas e regents.
|
|
Richard Lopez, practician de la pedagogia institucionala a l’escòla publica es investit dempuèi longtemps dins la transmission e l’ellaboracion de la PI, particularament dins l’associacion ChampPI, es tanben cò-responsable del camPaIròl de Montpelhièr. Interven dempuèi un detzenat annadas dins nòstra formacion. Venguèt al congrès dels 40 ans. Lo coneissèm plan. Mas aquí descobriguèrem lo cercaire. Entrevistèt regentas e regents, e tirèt d’aquò analisis que nos portaràn de segur plan d’aiga al molin de nòstres escambis e recèrcas (congrès, conselh scientific, paissèls ajudaires, rescambis, recampaments de regentas…)
|
|
Dobriguèt lo talh a prepaus del « traumatisme fondator» de la vergonha, de la question de l’equilibre entre engatjament e vida familiala, del bonur d’ensenhar, de la « construccion e remanejaments identitaris », de la nocion d’espròva, amai plan mai encara.
|
Al cap de quasi trente ans de praxis pedagogica per formar regentas e regents capables de relevar los desfises per l’educacion del sègle XXI, avèm pas mai de besonh de provar que que siá, ni de legitimar de causidas que capitan, mas lo trabalh de Richard Lopez, apuèi la tèsi d’Emilia Chorin a prepaus de l’ensenhament de las lengas e de Gregòri Andreo a prepaus d’accion culturala de las escòlas Calandreta serà una aisina de tria per nautres per avançar, e per discutir amb totes los partenaris.
|
|
article redigit en occitan lengadocian
|
|
|
|
|
|
|
|
|
|
«Musica a hum»
La clica Calandreta qu’ei aviada !
|
Lo projècte «Musica a hum» que hica en òbra la pedagogia Calandreta e implica los 4 pialars entà har arrajar la cultura e la lenga nosta en cada parçan!
|
|
En 2019 l’espectacle deus 40 ans de Calandreta en Bearn que’ns permetó d’imaginar ua accion tà har musica tà tots dab instruments en las mans de cadun. Lo Collègi de Gasconha e l’escòla paulina qu’obravan despuish bèra pausa tanben tà bastir un orquèstra a l’escòla entà partatjar la lenga e la cultura en dehens e tanben en dehòra deus establiments calandreta.
|
|
En Bearn, lo conservatòri (CRD) e las escòlas de musica tradicionau que vòlen téisher dab las Calandretas un ligam hòrt qui hàsquia espelir cultura e lenga nosta.
|
|
« Aprene », dab la formacion culturas qu’estudia despuish mantuas annadas los ligams hòrts enter musica e immersion. L’equipa culturas que cèrca a malhar e brocar musica, immersion e pedagogia calandreta. Lo benefici cognitiu de l’aprentissatge de la musica qu’ei adara coneishut e las darrèras recèrcas que parlan d’un vector de plasticitat cerebrau màger, tà la musica. Qu’inicièm 3 ans a, per’mor d’aqueras reflexions, ua formacion entà bastir orquèstres en las escòlas. Augan, en Bearn, qu’estó prepausada ua formacion de contunh tà participar a la coordinacion d’ua fanfara sus ua calandreta. Aquera accion de formacion que’s poderà perseguir entà participar a espandir mei anar mei « Musica a hum » suus diferents territòris ligants Calandretas e Escòlas de musica o conservatòris.
|
|
Apréner, cooperar, escambiar, partatjar qu’ei un teishut qui religa la pedagogia tant de las escòlas de musica de noste com de las calandretas. Un partenariat tà har shisclar la cultura e la lenga suu territòri que semblè, a tots los partenaris, ua evidéncia.
|
|
Un aperet a projèct ubèrt en abriu de 2023 per l’associacion Ligams* qui organisa cada dus ans « La Passem **», que’ns permetó d’obtiéner un finançament de l’instrumentarium e de har la crompa de 6 acordeons, de segonèrs***, flabutas de tres horats, tamborins de còrdas e tambors ; de que bastir 3 parcs instrumentaus en tribalhar dab factors e lutèrs locaus.
|
|
Desempuish seteme la clica « Musica a hum » qu’ei aviada mercès a l’energia tant de las equipas pedagogicas (conservatòri de Pau, regents deu collègi e de calandreta Paulina) com associativas (escòla – collègi e federacion departamentau 64). Aquera fasa test que’s debanè d’octobre a deceme en 6 sesilhas de 2 òras entà duas classas de CE2 a CM2. En seguint, duas purmèras restitucions qu’estón balhadas en public, lo 25 de noveme e lo 9 de deceme taus « bals en construccion » organizats per Calandreta e las escòlas de musica deu parçan. Qu’estó tanben lo parat taus associatius de har un taulèr restauracion taus musicians de las escòlas de musica en repeticion suu lòc, tà la serada. Qu’estó un vertadèr banh de cultura, de lenga e de paratge tà tots, ubèrt au public au còr de la vila de Pau. Quina beròja escaduda tà l’aviada !
|
Qu’ei déjà prevista ua seguida : Ua participacion a la hèsta de l’associacion cultura de Noste a Ortès dab la Calandreta d’Ortès e en seguint un regropament entà Bal en Vila au mes de mai a Pau .
|
|
Beròi camin tà Musica a Hum !
|
Per las equipas Culturas e Musica a Hum – Isabèu Vergnes
|
Ligams* Associacion oragnisatora de la Passem. ** La Passem Corruda tà la lenga qui trauca lo Bearn e adara que s’encamina audelà cap a la Bigòrra e a las lanas,*** segonèrs tamborins deu bascoat
|
|
article redigit en occitan gascon
|
|
|
|
|
|
|
|
Concours vidéo MARPOC 2024
Recebèrem un messatge de La MARPOC :
|
|
La MARPOC torna organizar son concors vidèo destinat als escolans e collegians.
|
|
Aquesta annada, pas de tèma, sonque la necessitat de far ausir los enfants que parlan la lenga !
|
|
La vidèo deu far 5 minutas maximum, pòt èsser una bona motivacion per los escolans, amai de pichòtas dotacions financièras vendràn recompensar los ganhants.
|
Joële Fesquier, membra del CA e Estela Mazodier, co-presidenta de la MARPOC, en carga del concors de vidèos.
|
Pensam qu’es una informacion interessanta de partejar amb las classas e ne profeitam per faire ligam amb la formacion continua «Film e film d’animacion» prevista del 13 al 15 de març de 2024 a la Calandreta Aimat Serre de Nimes, menada per Eric Lhéritier. Demòran encara qualques plaças.
|
article redigit en occitan lengadocian
|
|
|
|
|
|
Punt de vista
Hestenau de las refòrmas culturaus de Guardia Piemontese en Calabra.
|
Los 4, 5 e 6 de junh de 2023, que partí representar lo moviment Calandreta au hestenau de las refòrmas culturaus de Guardia Piemontese en Calabra (Italia).
|
|
Qu’estó lo parat d’encontrar monde d’ua petita vila qui parlan la nosta lenga dens lo sud deu país.
|
L’istòria de Gardià qu’ei la deus Valdés, pòble occitan protestant, qui quitè las vaths piemontesas d’Italia (val Pellis) dens la dusau partida deu sègle 13au pr’amor deu secutatge de la glèisa catolica.
|
|
Après 25 dias de caminada, ua petita colonia formada essenciaument de joens que’s vienó installar sus un territòri au sud, en tot miar dab eths la soa lenga e la soa cultura. Dab la soa arribada, que’s developè la cultura de la seda, la fabricacion de la lana e las tecnicas de tanatge deu cuer dens un parçan qui èra praube. Qu’èran obrèrs e tribalhadors deus grans e que permetón a Gardià ua expansion economica magèr. Protegits per l’Emperador Frederic II, rei de Sicila, que vivón en patz dab los catolics dinc au sègle 16 au, moment quan los Valdés de Gardià aderín a la refòrma protestanta provocant en 1560 la crotzada deu cardenau Ghuslieri, futur pape Pie V, qui’u exterminè. Lo massacre deu Valdès de Gardià que’s produsir los 5 e 6 de junh de 1561. Dens la nueit deu 5 de junh, los crotzats que s’introdusín dens la ciutat adromida e que massacrèn la populacion dinc au 6 de junh. Lo massacre qu’estó tant sagnós que disem que la sang e colava dens las carrèras per passar per la pòrta principau de la vila, nomenada adara « la Porta del Sangue ».
|
Los inquisitors qu’amassèn los susvivents de Sant Six (auta provincia d’Italia dens la quau los protestants estón massacrats) e que’us portèn a Gardià. Los susvivents qu’estón susvelhats e susmetuts a condicions de vita tarriblas : que devón escotar la missa cada dia, se confessar e comuniar a cada hèsta, portar ua pelha jauna dab ua crotz roja tà estar reconeguts, tiéner la pòrta de l’ostau uberta dab un frinestron qui s’obriva de l’exterior tà perméter au monge dominican de poder susvelhar l’interior de las maisons, n’avèvan pas lo dret de s’amassar a mei de 6 personas e de’s marridar enter valdés pendent 25 ans. Per assegurar lo manteniment de la fe catolica peus Gardiòles, las autoritats catolicas que hasón bastir ua glèisa e un covent. Los qui ensagèn de hugir las persecucions que s’anèn installar a Genèva e son adara los qui aperam « los refugiats italians ». Legir la seguida de l'article
|
|
article redigit en occitan gascon
|
|
|
|
|
Totas las nòvaletras son a posita al Forum Calandreta. Serà possible de reagir als articles.
Los qu'an pas accès a aquel forum poiràn mandar lors reaccions a las adreças çai-jos.
|
|
|
|
|
|
|
|
|
|
