Aquí que, al cap de las doas primièras setmanas d’estagi dins los locals d’APRENE, la còla Aprene-1 embarca a la proa de l’aventura Calandreta.
Un camin que sabèm rufe, mas enlusit per la fòrça de l’engatjament. Arronzejat, mas amb tot çò que lo bartàs ofrís de possibles e de libertat. Un camin qu’esperam long e urós.
Coma cada an, los parlars rajan dins la diversitat. Viure l’interdialectalitat, naturalament, en immersion. Un astre.
E, d’astres, ne serà question dins lo primièr numèro del jornal de la còla… un jornal nommat « Ensenhas ». L’anatz descobrir lèu, un pauc de paciéncia. Quitament se, astrucs, trobaretz mai bas dins la Nòvaletra lo primièr tèxte causit per la còla.
Es a saber qu’ongan la plaça serà facha dins la Nòvaletra per un tèxte eissit de la Causida de tèxte que se farà temps dels seminaris a Besièrs e Tolosa. A cada còp, demest los tèxtes que seràn publicats dins lo jornal de la còla Aprene-1, un article serà causit e mes al punt pels calandrins per tal d’èsser tanben publicat dins la Nòvaletra. Los autres escriches seràn corregits pels Paissèls de lenga sollicitats per ajudar cada persona long de l’annada.
Als vòstres ressons !
Xavi Ferré