Parlas occitan de longa e sens cercar tos mots ? Òsca ! Aquí una proposicion per ajudar los que cercan de còps los mots, o que mesclan, o qu’an pres la tissa d’utilizar un mot francés « occitanizat ».
Se pòt far amb de mots simples, de cada jorn, que capitas pas totjorn de memorizar. Te cal primièr partir en caça : la caça al mot se fa en dubrissent grand las aurelhas.
- Quand agantas un mot, agacha-lo un moment, escriu-lo per l’empachar de s’escapar.
- A partir d’aquí, te lo cal emplegar al mens 3 còps dins la setmana que seguís ta presa. Puèi, las 3 setmanas seguentas, lo te cal dire encara un còp la setmana, al mens.
Atencion : lo te cal emplegar dins de frasas corrèctas, en rapòrt amb la discutida. As pas lo dreit de cambiar lo subjècte per poder plaçar ton mot, ni mai de lo tornar dire 3 còps de seguida. E ara, a tu de jogar.
Adòpta tanben una expression
D’unas expressions occitanas semblan las del francés o d’autras lengas, mas d’unas son ben especificas. Amb Maurici Romieu ne prepausam dins l’agenda, cada dimenge, e son explicadas a cada periòde de vacanças. A tu de las far teunas, amb la meteissa regla : tres còps dins la setmana, puèi un còp cada setmana pendent tres setmanas.
Corina Lheritier