Lo divendres 27 e lo dissabte 28 al matin los sièis rasals immersius, Bressola, Calandreta, Seaska, Diwan, ABCM e Scola Corsa, foguèron convidats en Catalonha per una jornada de trabalh abans de téner lor tradicionala Amassada Generala. Los 50 ans de Bressola balhavan una plan bona escasença per s’acampar a Perpinhan, mas passat los moments festius, lo ton demorèt bravament studiós ! Al programa de talhièrs d’escambis seguits de botigas de produccions a l’entorn de las tematicas del moment : Licèu, prètfaches, contraròtle dels establiments, gestion dels salariats, Formacion inciala, MASTER, formacion continua, cap d’establiment, LSU… Los subjèctes manquèron pas de noirir las discutidas abans la mèsa en òbra d’avançadas notablas. L’endeman l’Amassada Generala confirmiguèt la bona santat et la vitalitat de l’ostal malgrat un contèxte politic dificil. Las perspectivas futuras van necessitar de segur de trabalhs e una susvelhança tota particulara de las proposicions que seràn faitas per afortir e desvelopar l’immersion.
En seguida de l’AG de l’ISLRF s’es tenguda l’AG d’ESKOLIM, los meteisses sòcis mas amb una mira politica. S’es debatut dels aisses a téner per l’annada a venir, reafirmacion de çò que fasèm amb un modèl immersiu (question jos-levada mai que mai per Scola Corsa e lo sistèma pas completament immersiu dins lo public Còrse), del ligam amb PQVNL, d’una accion comuna segurament lo 21 de novembre venent (mai d’informacions lèu), d’una demanda de rdv amb lo novèl ministre de l’EN e de l’accion que podrem menar per las eleccions presidencialas de 2027.
De tot aquò ne tornarem parlar lèu dins Calandreta, las consequéncias de las orientacions politicas an de repercussions dirèctas e concrètas sul nòstre movement.
Joan-Francés Albert e Cristèla Simonato