A la vista de las dificultats encontradas ongan per metre en plaça Escapolaire, la Confederacion decidiguèt de fisar a APRENE l’avaloracion del nivèl de competéncia en lenga dels calandrons.
De costuma, las tascas son partejadas, e lo regentum ajuda bravament. Mas, sens lo CFPO, lo seguit e lo tractament de las donadas non poiràn èsser assegurats per l’Establiment d’Ensenhament Superior Occitan qu’a pas los mejans umans per ba far.
Aquò’s una virada doncas e, clarament, una escasença per abaudir Camin De Lenga. Fa qualques annadas qu’experimentam aqueste dispositiu dins la formacion iniciala e, mercejant lo trabalh realizat pel Laboratòri dempuèi 2022, sèm lèstes per acompanhar sa mesa en òbra dins las escòlas. Pel segondari, la discutida es en cors per estudiar las modalitats per ongan.
Fins ara, un trentenat de Pagèlas (certificacions) foguèron complidas temps de la formacion iniciala. Pels adultes, s’agís de responsabilizar las personas que s’engatjan dins l’aprendissatge de la lenga-cultura occitana per tal de las rendre autonòmas e conscientas de la permanéncia e de l’exigéncia del camin entreprés.
Quand estudièrem lo biais d’adaptar lo dispositiu als mainatges dins la mira d’avalorar lo nivèl Aprendís-2 (correspond al A2 del EECRL), avisèrem que caliá servar los quatre domenis d’observacion, valent a dire la compreneson e la produccion, oralas e escrichas. L’èime demòra lo meteis.
Per rapòrt a Escapolaire, l’apròchi càmbia a respècte de qualques principis :
-Lo regent es en capacitat d’avalorar las competéncias dels calandrons de sa classa.
-L’avaloracion se fa mai que mai a partir del viscut, real, de classa.
-Lo seguit e l’avaloracion dels progrèsses en lenga dels calandrons se fa long de l’annada.
-Aprenèm mièlhs en cooperar, e doncas en grop. Los progrèsses de cadun son ligats a la dinamica del grop.
-La practica permanenta e conscientizada de la lenga es un atot per bastir un bilingüisme assegurat.
Per Calandreta, l’objectiu es d’avalorar las competéncias en lenga dels calandrons d’un biais adaptat e coerent amb la practica pedagogica de Calandreta. Los regents auràn d’institucionalizar Camin De Lenga dins la classa a partir d’aisinas e de luòcs identificats per fin d’acompanhar los progrèsses dels mainatges fins al nivèl Aprendís-2 al cicle 3. La tòca pel calandron es de manténer, mercé una conscientizacion de longa, un nivèl d’exigéncia de sa practica en tot identificar onte n’es de son camin de lenga.
Per çò qu’es de la mesa en òbra, s’agís de considerar Camin De Lenga coma una institucion de la classa immersiva. Es definit dins l’espaci-temps de la classa, en ligam amb las autras institucions, particularament los moments de produccions orala e escricha. Un regent-referent Camin De Lenga (autre que lo regent de la classa) es identificat per cada classa que los mainatges son inscriches a la Pagèla. Pòt èsser de la quita escòla, d’una escòla vesina o luènha, amai d’Aprene en cas de dificultat per trapar de referents.
Prepausam als regents concernits un acamp en visio per explicar tot aquò en detalh. Calrà causir demest las tres datas previstas :
-diluns 11 de decembre de 18h a 19h ;
-diluns 22 de genièr de 18h a 19h ;
-dimècres 7 de febrièr de 14h a 15h.
Traparetz mai d’entresenhas dins lo fichièr « presentacion-tuto_CDL » penjat a Estelum a la rasiga del dorsièr « Portfolios-calandrons ».
Xavi Ferré