Aprene o apregondir sas coneissenças de conjugason en occitan, gràcias a VÈRB’ÒC.
Es una aplicacion qu’existís dempuèi temps per trobar la conjugason de tal o tal vèrb, desvolopada pel Congrès Permanent de la lenga occitana, organisme interregional de regulacion de l’occitan (locongres.org). Mas dempuèi pauc, es enriquesida de foncions vocalas e ludicas per melhorar l’aprendissatge de la conjugason.
Es un vertadièr utís per se perfeccionar, que pòt servir als adults tanplan coma als mainatges.
Mai precisament, l’aplicacion vos prepausa un menut ric :
1- la recèrca de la conjugason de tal o tal vèrb (amb la possibilitat d’escotar la prononciacion de cada forma verbala !) ;
2- gardar d’unes vèrbs en favorit (l’estela) ;
3- aprene 15 vèrbs modèls, o de vèrbs irregulars, o los vèrbs favorits ;
4- jogar per afortir las coneissenças amb un flòc de possibilitats : trobar lo temps, trobar la persona, trobar la forma, trobar la conjugason, trobar l’òrdre, trobar l’anagrama, o dire se tal o tal vèrb es alternant o pas !
Amb tot aquò, segur que vos podètz amusar, vos podètz testar, e anatz progressar.
Alavetz, prenètz de bonas resolucions per l’annada novèla : pas pus d’errors de conjugason amb Vèrbòc !
(La podètz telecargar dins Google play store per Android, dins AppStore per iPhone)
Maria-Anna Poujade