Las edicions Vent Terral prepausan un libre de l’Eliane Gauzit que se ditz Faridondeta Revira-te ! Un libre amb de cançons e de vira-lenga en direccion dels mainatges es de segur pas una primièra, empacha pas qu’aquel d’aquí ten qualques originalitats que pòdon interessar, e benlèu interpelar, d’escòlas immersivas coma las nòstras. Lo nòstre objectiu es plan de faire venir locutors de mainatges que son malastrosament, per la màger part, bravament a l’abric de la lenga e de la cultura nòstra ! Sabèm totes que lo cant e los jòcs de lenga son plan favorables e quora los mainatges s’ensenhen entre eles las resultas son encara mai importantas. Es tota l’escomesa d’aquel obratge que presenta un repertòri puslèu original de 107 jòcs cantats acompanhats de particions musicalas. Aquela causida nos pòt permetre amai de faire viure un còp de mai lo « s’associar per faire escòla » qu’avèm plan sovent dins las nòstras escòlas de parents musicaires ! L’introduccion de gaireben quaranta paginas ajuda a comprene lo caminament de l’autora e balha plan de pistas que fan sens pel regentum. Soscam sovent a metre totjorn mai de lenga dins los nòstres espacis, e dins los nòstres temps, de classa coma periescolars. Aquel libre es segurament pas magic, mas s’amerita un pauc d’atencion!
Joan-Francés ALBERT
