Dempuèi l’an passat, l’establiment Leon Còrdas se torna investir dins lo programa Erasmus+, cabdelat per la Commission Europèa.
D’argent es mes a posita dels establiments escolars de totes los païses de l’Union Europèa mai qualques-uns.
Aquel argent es utilizable per organizar de programas d’estudi a l’estrangièr pels escolans, mas tanben pels professors. La cooperacion, l’inclusion, la creativitat e l’innovacion son mesas en valor. Es dobèrt de la mairala cap al licèu.
En 2024-25, l’establiment Leon Còrdas organizèt dos escambis amb de partenaris espanhòls, un en Catalonha a Olot, e l’autre al País Basco a Donostia. En tot 29 collegians e liceans passèron una setmana dins un o l’autre dels dos establiments partenaris. E un trentenat de joves foguèron aculhits a Montpelhièr.
Ongan, lo partenariat s’es alargat e lo projècte es ara tripartit, totjorn amb l’establiment Lauaizeta de Donostia, e un establiment escolar alemand bavarés de Poing, dins la banlèga de Munic.
Los joves se rescontrèron ja una setmana al País Basco en genièr. Poguèron vistalhar Donostia, lo musèu Guggenheim a Bilbao, la vila martira de Guernica. Rescontrèron tanben lo campion de levar de pèiras Iñaki Peraruna. Foguèron tanben convidats dins l’ostal de la comuna. Al dintre de l’establiment partenari, Iskatola Lauaizeta, aprenguèron de danças, de musicas, descobriguèron las « damborradas » de Donostia. Amassa comencèron la creacion d’un jòc interactiu en linha que se perseguirà pendent los dos autres tempses d’escambis previstes.
En març, los partenaris venguèron a Montpelhièr per trabalhar sus la diversitat de las lengas del projècte, e d’unas tradicions localas. Aguèron l’escasença de descobrir lo Polin de Pesenàs que festeja sos 800 ans ongan. Lo rescontre amb la còla del Polin e Claudi Alranq foguèt un moment de desoblidar pas. Vistalhèron tanben una manada en Camarga. Al collègi tres còlas de trabalh en descantonat obrèron sus la fabricacion d’un animal totemic del projècte, LoLa, e sosquèron a l’entorn de las lengas e de l’usatge rasonat de las rets socialas e dels otisses numerics jos forma de jòcs o de debactes movents. Un balèti foguèt organizat pendent aquela setmana. Foguèt un moment extraordinari tanben.
Al mes de mai, serà lo darrièr escambi : una còla anarà en Alemanha descobrir encara de causas novèlas e afortir l’esperit d’escambis, de descobèrtas e de plaser.
A costat dels viatges, lo projècte se mena pendent l’annada tota mercés a e-twinning, una plataforma europèa protegida d’escambis entre establiments escolars. Aquí, los joves poguèron escambiar d’informacions sus lors lengas respectivas, lor cultura amb lors especificitats tan coma los ponches comuns a la màger part dels joves europèus.
Los professors tanben aprofièchan d’aqueles escambis amb de collègas d’autres païses per escambiar sus las practicas, l’organizacion diferenta, los mai e los mens de cada sistèma escolar. S’investir dins un projècte Erasmus+ es de trabalh, mas quant de plaser ne sortís !
Francesa Junod