Foguèt, per APRENE, una annada densa, marcada per l’exigéncia de formacion e la volontat de transmetre çò que fa l’èime de Calandreta.
Davant la complexitat d’unes partenariats e quitament s’o deven menar tris, la dinamica cooperativa demòra una fòrça essenciala. A travèrs los luòcs associatius e pedagogics (Burèu, CA, Conselh de co-direccion, Correja, còla dels Paissèls Acompanhaires e Ajudaires), las orientacions causidas collectivament poguèron prene forma.
La formacion iniciala perseguiguèt son camin amb de còlas valentas, los ligams precioses amb la FDE de Carcassona, e l’acompanhament de tria de la part dels Paissèls e Bailes.
L’annada foguèt tanben marcada per de capitadas importantas al CRPE, çò que nos ofrirà una còla bèla l’an que ven en Aprene-3 / PEE. E aquò nos interèssa fòrça per apiejar lo fonccionar mes en plaça dempuèi setembre passat, valent a dire los seminaris multinivèls (amb las tres annadas de la formacion iniciala). O disiá Freinet : es a mai d’un qu’aprenèm sols !
La formacion continua, ela tanben, s’afortiguèt dins l’encastre del labèl qualitat EDUFORM. De formacions novèlas foguèron prepausadas als regents, als novelaris e als salariats non ensenhaires, e avisam que lo ròtle dels Referents d’accion de formacion ven un enjòc important dins l’estructuracion d’aquel camp.
D’autres talhièrs contunhan d’avançar : Camin de Lenga amb una pujada significativa del nombre de calandrons diplomats ongan, l’espandiment del fichièr Palancas dins la varianta lengadociana tre la rintrada de setembre, Estelum que s’estabiliza a dicha de combinas d’un bilhard a tres bendas mercejant lo Joan-Batista que s’i cura lo sicap !
Una part de desconeguda per l’ora demòra dins l’articulacion entre la formacion iniciala e lo cursus de Màster en ligam amb lo CRPE. Lo format tal coma lo visquèrem dempuèi d’annadas e que nos faguèt bona passada, lo nos cal imaginar autrament per tal de s’adaptar a la reforma del concors… Per l’ora lo scenari es encara entrevescat coma un camp de favas mas d’unas causetas se dessenhan dins una dralha qu’a la fin finala, espèri, ne tirariam la palheta..
Ara ven lo temps de pausar un pauc lo pas. Mercé a totas e totes per l’energia, la fisança e l’engatjament portats long de l’annada. Vos desiram de polidas vacanças amb çò que cal de repaus, d’ombra e de frescura !
Xavi Ferré