Lo dimècres 20 de decembre, a Montpelhièr, lo public èra talament nombrós per assistir a la defensa de tèsi que calguèt apondre un vintenat de cadièras ! Richard Lopez i presentava sa recèrca, entamenada fa mai de 5 ans, a prepaus de la « construccion de l’identitat professionala dels regents de Calandreta que practican las TFPI e l’immersion en occitan ». I aviá plan de mond de Calandreta, e avián rason. Lo moment èra solemne, coma de costuma dins l’encastre de la venerabla universitat, mas o s’ameritava : èra istoric. Es lo primièr còp qu’un trabalh scientific, seriós, menimós, es publicat a prepaus de nòstre biais de formar regentas e regents.
Richard Lopez, practician de la pedagogia institucionala a l’escòla publica es investit dempuèi longtemps dins la transmission e l’ellaboracion de la PI, particularament dins l’associacion ChampPI, es tanben cò-responsable del camPaIròl de Montpelhièr. Interven dempuèi un detzenat annadas dins nòstra formacion. Venguèt al congrès dels 40 ans. Lo coneissèm plan. Mas aquí descobriguèrem lo cercaire. Entrevistèt regentas e regents, e tirèt d’aquò analisis que nos portaràn de segur plan d’aiga al molin de nòstres escambis e recèrcas (congrès, conselh scientific, paissèls ajudaires, rescambis, recampaments de regentas…)
Dobriguèt lo talh a prepaus del « traumatisme fondator» de la vergonha, de la question de l’equilibre entre engatjament e vida familiala, del bonur d’ensenhar, de la « construccion e remanejaments identitaris », de la nocion d’espròva, amai plan mai encara.
Al cap de quasi trente ans de praxis pedagogica per formar regentas e regents capables de relevar los desfises per l’educacion del sègle XXI, avèm pas mai de besonh de provar que que siá, ni de legitimar de causidas que capitan, mas lo trabalh de Richard Lopez, apuèi la tèsi d’Emilia Chorin a prepaus de l’ensenhament de las lengas e de Gregòri Andreo a prepaus d’accion culturala de las escòlas Calandreta serà una aisina de tria per nautres per avançar, e per discutir amb totes los partenaris.
Patrici Baccou
