Lançada en setembre de 2023, la Nòva Letra es ara plan installada dins lo paisatge Calandreta. Cada primièr dimècres del mes, ensajam de partejar amb lo movement tot d’articles variats. La pedagogia, lo s’associar per faire escòla, la vida politica, las formacions, las recèrcas e los sentits de cadun an tota lor plaça al dintre d’aquel escrit que se vòl lo rebat tan fisèl coma possible del movement Calandreta. Per afortir justament la sieuna coëréncia, la Nòva Letra vos prepausa de vos associar encara un pauc mai en portant la vòstra contribucion al sieu contengut. Pensam, per exemple, que seriá plan interessant que de poder integrar regularament de retorns de s’associar per faire escòla, de paraulas de juntaires, coma de testimònis d’accions culturalas remirablas o de percors de parents cap a la lenga… Totes los subjèctes que vos semblan faire sens amb lo movement, o qu’avètz simplament enveja de partejar, seràn estudiats seriosament per permetre a cadun de s’apoderar encara un pauc mai un escrit que volèm cooperatiu e pertinent. Ara, es a vosaus de prene la pluma e de vos lançar ! Las vòstras proposicions devon èsser mandadas a l’adreiça seguenta : formacions@aprene.org
Joan-Francés Albert