Lo divendres 21 e lo dissabte 22 de març 2025 se tendràn los rescontres Xens de l’ISLRF del costat de Carcassona. L’ISLRF recampa desempuèi sa creacion en 1996 totes los rasals que fan d’immersion. Aital, Bretons, Alsacians, Basques, Catalans, Occitans e Còrses an costuma de se trapar per balhar una fotografia tan precisa coma possible d’ont ne sèm a prepaus de l’immersion.
L’originalitat de l’ostal ten segurament al fait que capitèt de metre en patz la pedagogia e la sciéncia. De totjorn, l’ISLRF aculhís e acompanha los practicians de las classas tot en desvolopant un sector recèrca que ven portar d’esclairatges fondamentals. Ongan la problematica del collòqui se vòl mai politica amb una question fòrta que s’amerita d’èsser pausada :
Cossí imaginar aprene la lenga per la parlar pas ?.
L’immersion nos mena a una lenga parlada e non pas a una lenga ensenhada.
Aquò sembla pausar questions, e gaireben problèmas, pels amoroses de la lenga unenca. Las diferentas intervencions scientificas prepausadas, coma los testimoniatges, balharàn l’escasença d’afortir e d’afinar encara los nòstres argumentaris e de dire encara un còp que l’immersion es mai una solucion qu’un problèma. E o direm encara mai fòrt, qu’es ara dins la lei !
Joan-Francés ALBERT
Article redigit en occitan lengadocian
Lo programa e lo formulari d’inscripcion seràn lèu en linha al sit de l’ISLRF
