Lo 24 de mai passat se tenguèt l’AG confederala a-z-Albi.
Un temps formal amb la presentacion costumièra dels bilances mas la volontat de ne far un vertadièr moment d’escambis sul fons de çò qu’es lo nòstre movement, son actualitat e sas perspectivas.
Calandreta es prigondament e per principi un movement militant. Lo contèxte de gestion del quotidian nos empacha de còps de menar las accions necitas per far viure aquesta dimension.
Amb una dotacion de l’Estat pels pòstes de regents pas a la nautor dels besonhs, una baissa de las subvencions de las collectivitats tot aquò malgrat una volontat ciutadana de transmetre la lenga, nos cal tornar prene plaça dins l’espaci politico-public.
Per aquò far, la dralha d’una sollicitacion cap al 1èr ministre, per li demandar una etapa 2 per aparar l’ensenhament immersiu de las nòstras lengas, aprèp la signatura del contracte d’associacion en 1994, nos sembla de biais.
Lèu, nos virarem cap a vosautres per metre en òbra, amassa, aquesta mobilizacion.
Los qu’an pogut participar a la fèsta de l’arribada de la Passem aprèp l’AG, jol lo pont vièlh d’Albi, son segurs, que de s’amassar, celebrar lenga e cultura es a l’encòp un plaser e vital !
Cristèla Simonato
