Dimars lo 1èr de julh se tenguèt l’Aviada de las Calandrinas a la calandreta del Garric. Un grandmercé a l’associacion que nos aculhiguèt dins aquel polit endrech de verdura e tot plen de vida, e particularament a la còla pedagogica per l’ajuda portada que nos a plan simplificada la tasca.
Aqueste eveniment ven marcar simbolicament l’identitat de la còla en primièra annada de formacion, e confirmar la causida d’un Endralhaire, valent a dire la persona que la còla s’identifica e que ne pòrtarà lo nom. Aviar, aquò’s metre sus la via, sul camin, sus la dralha.
Aguèrem doncas lo plaser d’aculhir lo bearnés Sèrgi Mauhòurat, contaire, cantaire, musician, regent en occitan, autor d’albums de joinessa…
Grandmercé a el per aquela polida serada plan rica !
Las calandrinas mancaràn segurament pas de faire una clinhada al darrièr numèro del ‘Quí Quiriquí.
Mercé egalament al quarantenat de regents qu’aculhiguèron una calandrina o un calandrin dins lor classa. Aquò representa un trentenat de Calandretas engatjadas per la formacion iniciala. E pensam amb plan de reconeissença a l’ensemble de las personas, los intervenents en particular, Pèire Peralta, Francina Pujol, Richard Lopez, qu’an acompanhat amb plan de biais o qu’an partejada, pauc o pro, l’aventura que representa l’annada Aprene-1.
Una annada a l’encòp intensa e necessària.
Intensa, pel ritme e la densitat dels aprendissatges, d’autant mai quand per d’unas i a lo Master a costat. Es una annada exigenta que demanda plan de nhaca e de teneson. Aquò’s solide ! Mas a l’encòp aquesta intensitat es tanben lo motur dels progrèsses que buta a sortir de sa zòna de confòrt.
Necessària, perque a Calandreta, avèm aquò d’especial qu’apondèm una annada de formacion dins lo percors cap al concors. Cossí que siá, es un temps essencial per verificar se l’immersion lingüistica, la pedagogia cooperativa e la dimension associativa correspondon plan a l’idèa qu’avèm del mestièr e a las valors que volèm portar, de longa… e longamai.
Xavi Ferré