Prima de 2018

La nòvaletra tòrna amb la prima !

Nos emplegarem a seguir las sasons

e ne mandar quatre dins l'annada.

Lo Collòqui ISLRF

Los 23 e 24 de març participèrem al collòqui de l'ISLRF, organizat pels collègas de Diwan e Kelenn a Kemper a l’escasença dels 40 ans de las escòlas. Plan de mond se metèron en posicion de cercaires pel talhièr organizat per Miriam Bras, Emilia Chorin e Patrici Baccou, e animat per Pèire Joan Laffitte, a prepaus de pedagogia del plurilingüisme e de comparason de lengas.

Una convencion amb l'ESPE de Corsega

Una convencion amb l'ESPE de Corsega se deuriá signar abans l’estiu per portar nòstres masters. Prepausarem aital, per la dintrada de setembre que ven, un master 1 e un master 2 en granda partida a distància e adaptats a nòstre biais : immersion e cooperacion. L'idèia de l’immersion es a progressar en Corsega ont se practica pas encara.

Escambis amb de regents de Grècia

Los ligams amb lo movement Freinet grèc Skasiarkeio (vòl dire «escòla bartassièra») son ara plan afortits. Las escòlas de Lengadòc aculhiguèron e aculhisson encara de regentas en estagi. Amb de perspectivas d'escambis, de correspondéncia e de formacions.

Dos universitaris taiwaneses en visita a Aprene

Dos universitaris de Taiwan venguèron visitar lo nòstre establiment. Pascal Hsu presentèt a la Calandreta del Garric d'escòlas qu'experimentan pedagogia e tecnicas que son plan en armonia amb las de Celestin e Elisa Freinet.

Jornadas de l'innovacion pedagogica

Las jornadas de l'innovacion pedagogica (« Total festum educacion ») se debanaràn los 13 e 14 de junh. Serà l'escasença bèla d’asemprar especialistas e afogats de l'edicion pels joves. I presentarem tanben lo novèl site experimental e collaboratiu « Revirar » que lo volèm, s'es possible, dobrir e arborar amb de partenaris coma lo CIRDOC e Lo Congrès Permanent de la Lenga Occitana. Notatz particularament la data del dimècres 13, que las PEE presentaràn sos projèctes.

Lo NAS

De mai en mai de regentas e regents s'inscrivon per aver accès al NAS (Nòstra Aisina Securizada). I pòdon bastir e noirir un portfolio professional e an accès a un fum de ressorças per la classa partejadas cooperativament. Trantalhatz pas a rejónher lo movement : es aisit, basta de mandar una demanda a Joan-Baptista Harduin, a contact@aprene.org .

Desiratz de faire de regent(a) a Calandreta ? Marcatz-vos a la Jurada !

Las inscripcions a la JURADA 2018 son dubèrtas dempuèi lo 1ièr de març e fins al 31 de mai.

En seguir lo ligam poiretz accedir a la procedura per se marcar, a mai las informacions per s'aprestar e lo debanament de las espròvas.