Aviam dit que l’annada sens formacion Aprene1 seriá una annada particulara ont caliá a tota fòrça s’imaginar un avenidor e trapar dralhas novèlas. De segur, caliá reviscolar una formacion iniciala e dins lo meteis temps melhor pensar lo nòstre ostal de formacion APRENE per li assegurar una perenitat. Foguèron pas paraulas en l’aire, e l’an passat començèt per un seminari a Carcassona ont venguèt evident que caliá obténer una labellizacion per faire reconéisser APRENE al prèp de l’Educacion Nacionala mas tanben al prèp del ministèri del trabalh per aver dreit, enfin, a d’unes finançaments indispensables per la menada de l’ostal. Lo labèl Qualiopi èra dins totes los caps mas es cap a EDUFORM qu’avèm causit d’anar. Faguèrem aquela causida qu’aviam lo sentiment qu’aquel labèl plan mai exigent, nos daissariá la plaça per faire existir las nòstras singularitats. Aqueste trabalh gigant necessitèt un acompanhament professional de la part de la Aurélie Rossi per verificar d’en primièr se la nòstra candidatura èra compatibla amb lo referencial EDUFORM abans de se lançar dins las primièras grandas discutidas amb lo mond de la DEGESCO. Aquí, foguèt benlèu la primièra granda suspresa. I a totjorn de la nòstra part una mesfisança legitima per aquela institucion que faguèt la pròva mai d’un còp qu’èra pas una granda amiga de l’immersion mas dins l’encastre de las formacions las paraulas passèron jamai per aquel prisma. Prenguèron lo temps de nos explicar mas sustot de nos escotar. Nos ajudèron a nos melhor descriure, nos melhor presentar e nos balhèron pistas preciosas per capitar. D’una visiò sus l’autra, d’escambis de mails en escambis de mails, aquel camin venguèt visible. Fin, mas visible. Calguèt mutiplicar las acampadas e los temps de trabalh cooperatius per respondre a totas las espèras e per poder presentar l’establiment APRENE dels temps dels audits amb d’autres mots, d’autres concèptes e d’autres imatges. Plan de causas foguèron cambiadas, e plan de causas van cambiar dins los meses e las annadas que venon encara, mas i avèm res perdut del nòstre èime o de las nòstras singularitats. Al contrari, tot çò que nos fa foguèt pres en compte e joslinhat. Uèi APRENE es reconegut e labellizat (catégorie Actions de formation). Es una granda victòria collectiva, cooperativa e bravament umana. Nos en podèm felicitar !
Joan-Francés Albert