Al congrès de 2022 «Viure l’immersion» de dralhas foguèron presas per facilitar e melhorar la sieuna mesa en òbra. Lo besonh gaireben primièr èra de prepausar de documents sintetics per s’apoderar un vocabulari minimum e de frasas especificas per endralhar un vertadièr camin de lenga a destinacion dels parents, de las ajudas, dels interveneires, o d’autres. Aquelas afichas an foncion d’ocupar una plaça estrategica dins los establiments e d’èsser socializadas tan coma possible cap a las familhas en particular. Per menar aquel trabalh, una còla s’acampèt dins un temps primièr per collectar tot çò qu’existissiá. Las iniciativas dins aquel domeni son pro nombrosas, çò que confirma lo besonh, e d’unas escòlas son annadas pro luènh. A partir mai que mai del libròt fargat per la Calandreta d’Albi, e d’autres documents experimentats dins mantuna Calandreta, d’unes Paissels-Ajudaires, trabalhèron a una adaptacion per ne fargar doas afichas de penjar dins totas las Calandretas. Mercé a l’ajuda de regents de totes los dialèctes, de versions son disponiblas en lengadocian, gascon, auvernhat, provençal e limosin. Aquelas afichas foguèron ofèrtas en version papièr al darrièr congrès e son disponiblas sul forum se aquò fa mestièr : «cossí legir l’occitan» e «frasas claus». Esperam que seràn d’utisses utiles que trobaràn bona plaça sus las parets de las escòlas.
Cristèla Simonato