I tornam ! Amb estrambòrd, o cal dire, que los 126 calandrons diplomats Aprendís-2 en junh passat son la pròva bèla que lo camin es enregat a de bon.
Dapassièrs, i èrem anats a temps e léser. Foguèt una annada experimentala. Nos chautàvem de rassegurar lo monde, quitament nosautres meteisses… Cal dire qu’avèm tendéncia a rasonar aital : « res dire qu’ajam pas fach ».
Rassegurats, o sèm ! E mercejam totes los qu’an butat a la ròda, calandrons, regentum, l’Ofici Public per La Lenga Occitana que se carguèt d’imprimir los polits diplòmas.
Fuòc verd doncas ! APRENE es al trabalh per afortir lo dispositiu CAMIN DE LENGA. Debuta de novembre, aquò serà una sesilheta d’informacion per o amodar e generalizar dins las classas de cicle 3.
En meteis temps, continuam d’obrir lo talh pels cicles 1 e 2 amb una experimentacion novèla per l’avaloracion del nivèl Aprendís-1 en fin de mairala. Aquò se farà en ligam sarrat amb la pròva del Termomètre Lingüistic ja practicada dempuèi un brieu dins las calandretas.
Çò meteis pel collègi que las causas son a mand de s’endralhar amb qualques professors d’occitan. En mira, lo Biaissut-1.
Caminam que caminarem !
Xavi Ferré
article redigit en occitan lengadocian