Avèm mes en plaça un Nextcloud accessible a aquesta adreça : https://nextcloud.aprene.org. Aqueste servici es concebut per respondre als besonhs dels regents e dels associatius de Calandreta, en ofrissent una alternativa liura e segura a las solucions proprietàrias coma Google Cloud.
Perqué causir aqueste servici ?
Nextcloud es una solucion que respècta vòstra vida privada e que vos permet de gerir vòstras donadas personalas o professionalas. Amb aqueste servici :
- Cada utilizaire dispausa de 10 Go d’espaci d’estocatge.
- Avètz accès a un ensemble d’otisses collaboratius e productius.
- Contribuissètz a l’usatge dels logicials liures, en sostenent lors valors d’autonomia e de partatge.
Foncionalitats disponiblas
Aquí la lista dels servicis que seràn accessibles un còp lo compte creat :
- Gestionari de fichièrs : Estocatz, organizatz e partejatz vòstres documents amb facilitat.
- Fòtos : Gerissètz vòstras fòtos sens complicacions.
- Chat (Discussions) : Comunicatz rapidament amb los autres utilizaires mercès a un sistèma de messatjariá instantanèa.
- Corrièr electronic : Accedissètz a vòstra boita mail dirèctament dempuèi Nextcloud.
- Calendièr : Organizatz vòstres rendètz-vos e projèctes.
- Collabora Office : Una suita burotica en linha que permet d’editar de documents dins de formats liures coma .odt, .ods, .odp.
- Deck : Gerissètz vòstres projèctes amb un otís Kanban.
- Contacts : Centralizatz vòstres contactes.
Condicions per crear un compte
La creacion d’un compte es dobèrta a totes los sòcis del movement Calandreta (regents, associatius, salariats non ensenhaires, etc.).
Quand creatz vòstre compte, signatz automaticament la carta informatica d’APRENE.
De mai, cal justificar vòstra demanda de creacion de compte en mandant un mail a contact@aprene.org. Dins aqueste mail, precisatz vòstre ligam amb una escòla o la rason especifica de vòstra utilizacion.
Cossí crear vòstre compte ?
Anatz a https://nextcloud.aprene.org.
Clicatz sus « s’inscriure » e emplenatz las informacions demandadas.
Mandatz un mail a contact@aprene.org amb vòstre justificatiu (exemple : escòla o projècte).
Un còp vòstre compte validat, recebretz un mail de confirmacion.
Esperatz pas mai per profeitar d’un espaci collaboratiu, respectuós de vòstras donadas e adaptat a vòstres besonhs ! Se tenètz de questions, nos podètz contactar sens problèma.
Joan-Batista Harduin