Qu’es aquò ?
Coma la seuna cosina gascona, es una escorreguda relai. L’idèia es de faire aquela corsa en promòure la lenga e la cultura occitanas sul departament, dins Tarn.
Se debanarà los 23 e 24 de mai de 2025 pendent mai de 30 oras sens interrupcion en se transmetre cada quilomètre lo « ligam », testimòni simbolic de la lenga. Aqueste ligam,que conten un messatge escrit, serà legit a l’arribada !
Lo percors representa mai o mens 230 km de Sant Somplesi a Albi en passar per Castras, traversarà un fum de vilas e vilatges tarneses.
Lo messatge fòrt d’aquela manifestacion es de dire que la lenga es viva ! Es un eveniment esportiu, festiu e familial ont dins cada vila traversada i a l’enveja de faire una o mai d’una animacion per la lenga e la cultura !
Es tanben l’escasença de collectar de fonzes pel finançament de projèctes en favor de la transmission de la lenga occitana amb la venda dels quilomètres als particulars, a las associacions, a las collectivitats e a las entrepresas.
Es una fèsta per far viure la lenga occitana e totas las associacions occitanas del recanton (IEO Tarn, Lo Comitat Festayre, Tarn Coeur d’Occitanie, Calandreta, Cordae La Talvera…) se son amassadas per faire d’aquel eveniment una capitada de las bèlas !
Se volètz aderir e nos sosténer, traparetz çai-jos totas las entresenhas !
A plan lèu,
Emilie Bret
Article redigit en occitan lengadocian
