A Calandreta, la creacion d’un lòc d’encontre entre delegats e ligaires permet dempuèi qualques annadas d’aprestar e seguir las reflexions collectivas sus la vida e lo foncionament del movement. Aqueste espaci d’escambis, de discussions, de seguit e d’elaboracion es vengut essencial per afortir la coeréncia de l’anar de nòstra movement.
Aquel lòc d’encontre es abans tot una oportunitat per abordar conjuntament las grandas tematicas pedagogicas, administrativas e financièras que determinan l’evolucion de Calandreta. La participacion activa de totas las regions a travèrs cada persona, que siá delegada, ligaira, coordinatritz, associativa, co-directritz del centre de formacion APRENE es una garantida de pluralitat de punts de vista e de riquesa dels escambis.
Dins aqueste espaci, las problematicas pedagogicas son sovent al centre de las discussions. La promocion de la lenga occitana e la qualitat de l’ensenhament, dins las escòlas e dins la formacion iniciala e continua del regentum son d’objectius partejats. Per aquò, l’aprestatge de la jornada pedagogica confederala es plan important. Aqueste encontre permet de partejar las darrièras novetats en matèria de formacion, tant al nivèl pedagogic coma al nivèl lingüistic. La coordinacion dels ligaires, delegats e paissèls-ajudaires e la creacion de novèlas modalitats de formacions e de seguits, flexiblas e adaptadas a la realitat de cada region, son al centre de las preocupacions.
La gestion dels mejans, l’adaptacion dels dispositius existents als besonhs locals, e la recèrca de novèls partenariats institucionals e associatius son de tematicas claus que son sovent abordadas en aqueste lòc. La creacion de novèlas collaboracions amb d’organismes coma lo CIRDÒC permeton de far avançar la visibilitat e l’eficacitat de Calandreta a totes los nivèls.
En fin, aqueste lòc d’encontre es un espaci viu e dinamic, onte cada trobada permet de participar a construsir, pas a pas, l’avenir de Calandreta. Es un espaci ont se pren en compte las demandas, las dificultats e se tròban de solucions collectivas, amb l’objectiu d’assegurar una educacion de qualitat per cada mainatge que passa las pòrtas d’un establiment Calandreta. A travèrs la reflexion comuna, se manten una volontat d’afortir la vision pedagogica e lingüistica de Calandreta.
Felip Joulié
Article redigit en lengadocian.