Dimècres 26 de març de 2025
Mercé al centenat de regents e salariats, d’aver fait un còp de mai lo viatge cap a Masamet per la nòstra Jornada Pedagogica Confederala !
Lo programa d’ongan èra, coma de costuma, d’una granda diversitat. Anèrem doncas joiosament de las vesitas d’establiment, als portfolios en passant per la formacion en lenga, l’acuèlh dels mainatges particulars, lo peri escolar, la ligason cicle 3 e 4 sens desbrumbar de gardar un uèlh cap al nòstre estelum ! Cadun i trapèt una plaça, puèi un intérès, e, objectiu ultime, de plaser !
Mas los tempses nos fan passar a un messatge mai seriós : la situacion economica mai que mai va demandar a las Federacions totas de tornar pensar lor modèl economic e de faire pròva d’una granda imaginacion per resòlvre l’equacion espinosa entre lo nombre de pòstes finançats e lo manten de la qualitat pedagogica al dintre dels establiments. A l’economic s’ajusta de càmbiaments a venir dins de luòcs de decisions importants : lo trabalh es endralhat per la direccion d’APRENE e deman, serà per la direccion confederala.
Lo movement nòstre es a una virada e la caldriá prene collectivament e en consciéncia : al dintre del regentum, caldrà faire bolegar tanben qualques linhas e s’imaginar de perspectivas. Puslèu que d’esperar los càmbiaments, es mièlhs de los anticipar o encara mai, de n’èsser a l’origina. Deman, i aurà lo movement dels regents ont i aurà besonh de s’associar e de faire d’esfòrces, pendent la jornada i agèt una crida per s’investir mai dins la formacion iniciala e continua e mai generalament dins totas las estructuras del movement. Sentissèm una baissa d’engatjament, una manca de volontats mas lo principi d’un movement es plan de s’arrestar pas jamai, qu’una pausa tròp longa, o pièger encara, un arrèst, nos pòt èsser fatal.
I cal soscar, tranquillament, sol dins lo vòstre cap, en còla pedagogica, en acamp de cicle e dins totes los luòcs ont pensatz aquò pertinent. Ajudarà de segur.
Enfin, e per çaquelà conclure sus una nòta mai leugièra, es impossible de pas aver una pensada pel Patrici Baccou. Lo sieu camin de regent comencèt dins la primièra classa Calandreta del Lengadòc per s’acabar a la direccion d’APRENE. Dificil de faire mièlhs en matièra de camin. Podèm dire que passèt las sieunas cenchas de pedagogia e d’amistat totjorn a l’unanimitat sens jamai espotir degun. Legitim a cada pas, capitèt totjorn d’entraïnar los autres dins la sieuna logica. Excellent dins « lo faire » la classa, o foguèt tanben dins la menada de còla, e per imaginar la formacion. Li devèm d’aver fait de la cooperacion una practica indefugibla. Totes, lo saludam coma se deu !
Maria-Anna Poujade – A partir del discors d’introduccion de JFA