Lo divendres 21 de març e lo dissabte 22 de març de 2025 se tenguèron las Xenas jornadas de l’immersion del costat de Carcassona. Aital, cada dos ans, los sièis rasals immersius, ABCM, Diwan, Seaska, Bressola, Scola Corsa e Calandreta se recampan per desvolopar una tematica causida a l’entorn de presentacions scientificas e de testimoniatges. Lo subjècte d’ongan partissiá de la decision curiosa del 21 de mai de 2021 del Conselh Constitucional a prepaus de l’ensenhament immersiu :
“ L’enseignement immersif d’une langue régionale est une méthode qui ne se borne pas à enseigner cette langue mais consiste à l’utiliser comme langue principale d’enseignement et comme langue de communication au sein de l’établissement.”
Décision n° 2021-818 DC du 21 mai 2021 du conseil constitutionnel
En qualques mots, comprenèm mièlhs la logica installada dins l’ensenhament e las resultas marridas que ne seguisson en matèria d’aprendissatge de las lengas en França. Estudiar una lenga pòt èsser interessant a la condicion de la parlar pas ! Aquel rasonament s’amerita d’èsser publicitat tant es simptomatic de la volontat de França de daissar lo francés en posicion egemonica. Aquò dit, las doas jornadas faguèron justament la pròva que l’ensenhament immersiu questiona e se questiona. Amb cada jorn, la presentacion de pas mens de sièis recèrcas scientificas e de quatre testimoniatges, los participants an mesurat las avançadas coma l’inventivitat dels rasals immersius per totjorn melhorar los dispositius. Amb gaireben 50 ans de practicas per d’unes, podèm rasonablament pensar que lo temps de l’experimentacion es acabat e que i a segurament d’unas causas de considerar coma puslèu finas ! En tot cas, los retorns dels participants foguèron a la nautor de las espèras. De notar que del temps de la primièra jornada lo sénher Molac tenguèt a s’associar a la reflexion collectiva en visioconferéncia per faire lo punt a prepaus de la mesa en òbra de la sieuna lei e de las oportunitats a sasir per la securizar encara mai dins los meses que venon.
Aquelas jornadas foguèron un temps fòrt per valorizar, e defendre, las nòstras lengas un còp de mai. L’ensemble de las comunicacions faràn l’objèctes d’una publicacion del temps de l’annada a venir per contunhar de faire de l’ensenhament immersiu un vertadièr subjècte d’autant que demòra lo biais mai eficaç per dire de s’apoderar e de parlar una lenga.
Joan-Francés ALBERT
