Lo dijòus 3 d’abril passat, un moment fòrt pels establiments Calandreta de Lengadòc se tenguèt a la basa departamentala de Bessilhas, a Montanhac, dins Erau, de 9h fins a 15h: lor 26n recampament annadièr.
Aquel recampament qu’es una jornada d’escòla en defòra de la classa es tras qu’important pels calandrons perque lor permet de véser que son pas isolats e sols a parlar la lenga.
Foguèt una bèla capitada.
Lo tèma d’ongan èra « Jogar en Lenga Nòstra ».
Prèp de 1400 calandrons, de la mairala fins al licèu, escambièron e joguèron en occitan a l’entorn de talhièrs menats per de calandrons per d’autres calandrons.
Un espectacle per las mairalas « Lo lop que descobrissiá lo país dels contes » : l’escasença d’escotar una lenga chucosa e un jòc de teatre a faire espetar los rires de totes los pichons.
Ràdio Lengadòc organizèt long de la jornada d’entrevistas de participants, d’unes menats per de collegians, acostumats a l’exercici mercés al talhièr que se debana del temps de l’annada escolara.
A 13h, escolans e adultes se trobèron per far petar amassa lo Se Canta e La Sobirana e de se balhar rendètz-vos per l’an que ven.
Patrici Rampon e la còla organizatritz
