Adissiatz brave mond !
L’avèm fait ! Avèm capitat la nòstra La Passem Tarnesa. Quina aventura Extra-Ordinària ! Que d’oras de visio o d’acamps mas per far viure la lenga occitana dins Tarn va caliá faire. Es una necessitat, avèm una responsabilitat bèla dins lo futur que volèm balhar e portar cap a la lenga e cap a la trasmission.
De Sant Sulpici la Punta en passar per un fum de camins e de vilas tarnesas per fin finala arribar a z-Albi, avèm traversat e mostrat que la lenga e la cultura occitana son plan vivas e que pòrtan en elas l’avenidor. Tornèrem rendre visible quicòm que de costuma s’amaga e l’aventura s’arrèsta pas a n’aquò.
L’etapa seguenta : un bilanç per l’associacion Ligams Tarn, la venda de km fins al 15/06 (alara se coneissètz de mond interessats, trantalhatz pas de far virar l’informacion) e benlèu una escorreguda l’an que ven per faire la ligason amb los Gascons.
Quines sostens e vams avèm agut ! Quitament se d’unas causas demandan d’èsser melhoradas.
Quina fiertat dins l’agach dels mainatges a la partença o a l’arribada e tot lo long del camin. I sèm : la lenga es plan viva e va contunhar de viure encara longtemps perque los pichons trantalhan pas eles : cantan, rison, parlan en occitan, son fièrs de cridar : Pichon pachon, pichon pachon, La Passem e de portar lo ligam!
Fotografia de l’arribada dins las carrièras albigesas de Cléa Korol.
Alara coma lo ditz la cançon de La Talvera: « La passam La Passem, Caminan, corrissèm, Nos prenèm per la man, Dançam per l’occitan ».
Plan bona fin d’annada escolara a totis,
Emilia Bret