Amb lo tornar de la formacion Aprene-1, l’annada 2024-2025 foguèt marcada per una dinamica que nos agrada de viure. D’autant mai que del costat de la còla Sèrgi Mahòurat, endralhada lo 1èr de julh a la Calandreta del Garric, las causas seràn anadas sus las quatre ròdas. Una còla solidària, valenta, curiosa e sempre agradiva. Podèm sens retenguda presar lo privilègi que foguèt per totas e totes que las avèm costejadas.
Ongan encara, la còla d’APRENE se trapèt a plen pitre sul talh. Lòcs coma lo Conselh de co-direccion, la còla Correja e la formacion dels Paissèls Ajudaires, dinamisan l’anar pedagogic del Movement Calandreta.
Annada de transicion tanben, que Patrici Baccou partís a la retirada, mentre qu’Audrèi Dumas e Maria-Pèire Cransac son vengudas Paissèlas Ajudairas mercejant lo dispositiu « Represa pedagogica » de la formacion PA.
Ongan encara, una produccion abondosa : los trabalhs a mira cooperativa de las PEE que ne tornarem parlar l’an que ven, lo jornal ‘Quí Quiriquí de la còla Sèrgi Mahòurat, lo trabalh sus las palancas amb las conselhièras pedagogicas de l’Academia de Montpelhièr, l’organizacion de la jornada d’estudi amb Experice e lo CIRDOC a prepaus de l’acuèlh multilingüe e de las migracions, la participacion a diferents collòquis (Agaches, ISLRF, Pedagogia e Psicoterapia Institucionala, CALR de Montpelhièr e Bordèu…), la Nòva Letra portada per APRENE e la Confederacion amb cinc articles per mes e l’enveja per l’an que ven d’una implicacion mai granda de las còlas pedagogicas.
Dins lo segondari, dos seminaris son estats menats amb Leon Còrdas, e una primièra collaboracion amb Clardeluna dobrís la via a una organizacion mai formala tre la rintrada.
Lo partenariat amb lo Master MEEF demòra actiu, malgrat las incertituds ligadas a la reforma del concors.
L’òbra nòstra, la nos cal de longa arrancar del precari que, a l’exemple de la granhòta dins l’aiga cauda, l’acostumança nos i poiriá condemnar sens que trapèssem aquò dessenat. Es per aquò que sèm plan contents e fièrs d’aquesta annada marcada per de reconeissenças institucionalas importantas. Après lo label Eduform obtengut lo 11 de julh de 2024, recebèrem l’acreditacion coma centre de preparacion al DCL (Diplòma de Competéncia en Lenga) lo 25 de març de 2025, e dempuèi gaire l’inscripcion a la lista de las estructuras que pòdon sollicitar la sòlda de la talha d’aprendissatge.
Per tant l’obrador s’atupís pas al calimàs ambient, d’ara enlà la migracion d’Estelum cap a Nextcloud es prevista temps de las vacanças fins a la fin del mes de setembre. Aquò va representar un esfòrç evident mas que deuriá pagar en retorn amb una ergonomia plan mai agusada de l’aisina.
Lo Camin de Lenga vei passar lo nombre de certificacions Aprendís-2 de 130 l’an passat a 200 ongan. Amb la mesa en plaça d’Aprendís-1 a la mairala e l’integracion del Termomètre Lingüistic, d’unas resultas ponchejan, signe d’una seguida mai afortida l’an que ven.
L’annada passada confirma una trajectòria de consolidacion e d’obertura. Entre rigor pedagogica, innovacions partejadas e ancoratge cultural, APRENE contunha son camin amb fisança cap a una annada 2025-2026 rica en perspectivas.
Xavi Ferré