Tornem ! tornam, torna que tornaràs… es aquò la r-intrada, un ja-viscut embugat a l’encòp de nòu e d’esprovat, un indefugible. Mentre que lo collèga, afairat a las vendémias, que prenguèt la retirada l’an passat, me disiá l’autre jorn l’estranhesa de pas tornar viure aquesta re-intrada que dempuèi 60 ans aviá pas jamai desatelada.
E puèi… «re», coma renovèl. E òc ! novelum pel nòstre Estelum que migra dempuèi Synology cap a Nextcloud. Tant val dire que sèm totes a plen pitre sul talh. L’eissida deuriá satisfaire, saique estrambordar, tant las foncionalitats descabestradas nos van cambiar la vida… numerica. Zo! Brancatz-vos ! Contactatz Joan-Batista en cas de dificultats. Programarem de sesilhetas de formacion per la presa en man de l’esplech.
Pertocant la formacion iniciala, una clinhada particulara a la còla Sèrgi Mauhorat que tornarem trapar amb plaser en Aprene-2. Dins qualques tempses, l’arribada de la còla novèla en Aprene-1. Logicament, n’auretz ressons a chicas e micas long de las parucions del jornal. E tornamai, las tres PEE passaràn per la casa APRENE per una tresena e darrièra estapa de la formacion iniciala. Carton plen doncas ! Puèi pensam tanben a las personas marcadas en Master MEEF a Carcassona e lor desiram plan de vam e de capitada.
La formacion iniciala, l’anam tanben experimentar amb un format novèl : tre qu’es estat possible avèm programat de seminaris multinivèls per permetre a las diferentas còlas d’escambiar e trabalhar amassa… Totes sul meteis tatami !
En meteis temps, a la seguida de la crida als projèctes del mes d’abril, nos regaudissèm de la mobilizacion bèla del regentum per prepausar un cinquantenat d’accions de formacion continua dins l’encastre del procediment qualitat Eduform. A-n-aquò s’ajustan d’autras formacions mai especificament sostengudas per la Confederacion Calandreta. Podètz tre ara consultar lo site d’APRENE per causir las accions que correspondon als vòstres besonhs. Esperam que malgrat l’esfòrç qu’aquò representa, las equipas pedagogicas se saupràn encoratjar mutualament per far viure plenament aquelas formacions continuas. Aquò’s una fòrça qu’avèm per manténer las nhacas individualas e la dinamica del movement nòstre.
Polida annada escolara a totas e totes !
Xavi FERRE