Vos desiram un plan polida dintrada 2025-2026 !
La jòia de tornar véser los calandrons dins los nòstres establiments es totjorn un moment que presam e vos desiram de lo viure sens retenguda ! L’annada 2025-2026 tendrà pasmens un caractèr pro particular que serà una annada congrès. Aquel temps per pastejar lo projècte Calandreta es totjorn un temps fòrt que s’amerita una preséncia fòrta. Vos demandam doncas d’integrar dins los vòstres moments associatius e pedagogics de temps per ne parlar. Als nòstres afars intèrnas vendràn s’apondre los temps de las grandas causidas amb las municipalas d’en primièr puèi una presidenciala. Calandreta a pas de causir un camp, ba sabètz, per contre a d’interpelar plan en amont los candidats a prepaus de las nòstras problematicas.
Avètz reperat que lo contèxte nos es pas favorable amb de baissas significativas de totas las ajudas, Estat, Region e Despartament. Avètz tanben identificat que la lei Molac de 2021 es totjorn parcialament aplicada e qu’una sola circulària sembla fragila per protegir l’immersion. Los temps se tiban, e fa temps que sèm pas anats per carrièras. Ongan es quicòm que nos cal pensar e sustot concretizar. Lo nòstre capital simpatia es totjorn important mas las problematicas realas dels movements son pas pro mesas en lum. Aurem besonh de vos e de çò que sèm es a dire un movement associatiu conscient de sas dificultats, mas totjorn fòrça de proposicion e de vam al servici de la lenga e de la cultura nòstra.
Bona dintrada, a totes ba farem tot !
Joan-Francés ALBERT e Cristèla SIMONATO