Pendent l’annada de PEE, los projèctes son variats, per lor format, per lor durada, per lor objectiu. L’un d’eles se deu cooperatiu. La cooperacion la trabalham en classa, ensajam de la far naisser puèi viure al dintre de las còlas, del grop classa qu’avèm per l’annada. Se l’aplicar a se es quicòm mai, pasmens primordial. L’exercici es doncas logic e coerent, en tant que regent.a.s : nos cal saupre cooperar, cooperar amb los collègas, regents, ajudas mairalas, animators e parents.
Los parents, justament, foguèron mon ponch de partença.
Dos ans fa, quand arribèri dins la classa de PS/MS me mainèri qu’aquesta classa èra particulara perque i aculhissèm de novèls mainatges mas tanben de novèls parents que començan lor camin de parents d’escolan, parents d’escolan a Calandreta. N’i a qu’o son ja, mas, quand un novèl enfant de la familha dintra a l’escòla, quita lo nis, los parents los cal aculhir, un pauc diferentament dels autres segur mas totjorn en los daissar a lor plaça de parents.
Primièr, los voliái aculhir dins lo banh lingüistic que metèm en plaça a Calandreta. Segon los parents, l’occitan es un lenga somiada, desconeguda, ausida de luènh, parlada. Farguèri pr’aquò un document pels parents que tornava prene d’unes elements ligats a la lenga occitana (grops de musica, una explica cap a l’istòria de la lenga) e lor donèri a l’acamp de dintrada.
A ma granda suspresa, plen de parents me tornèron parlar del document e me mercegèron per aquò.
Vertat que quand arribam a Calandreta, las informacions son nombrosas e divèrsas entre lenga, pedagogia, investiment associatiu, pasmens, a la debuta,coma dins cada escòla, lo principal pels parents es que lor enfant començe son cursus escolar dins de bonas condicions (e qu’arrèste de plorar lo matin…).
Dins l’annada, aguèri un molon de questions cap a la pedagogia utilizada, las institucions, qu’en aqueste atge es pas totjorn evident pels enfants de contar a l’ostal çò que vivon en classa e puèi o cal dire, n’an sovent pas enveja !
Prenguèri la decision d’organizar un acamp a l’entorn de las cenchas e del quasèrn de cenchas per respondre a lors questions mas o podiái pas prepausar per caduna de las institucions !
Es d’aquí qu’es venguda l’idèia de mon projècte a mira cooperativa : una maleta d’acuèlh pels parents de pichona seccion. La maleta, l’imaginavi materiala puèi s’es transformada a flor e a mesura de la soscadissa en un objècte virtual per que se pòsca partejar al mai grand nombre. Pren doncas la forma d’un padlet, decopat en 4 rubricas que correspondon als pilars de Calandreta :
- cultura
- lenga occitana en immersion
- pedagogia
- escòlas associativas al dintre d’un moviment
La construccion del « padlet » se faguèt en cooperacion amb un paire de la classa.
L’idèia èra pas de far quicòm d’exaustiu. Ja perque aviái pas pro de temps per aquò far mas sustot perque voliái pas tanpauc que los parents aguèsson tròp d’informacions, que foguèsson perduts e qu’aguèsson pas l’escasença de descobrir d’unas causas per eles meteis. Espèri qu’aurai capitat de los atalentar sens los estabosir !
Vos doni doncas aquí lo ligam d’aquesta maleta : https://padlet.com/psmscandola/maleta-d-acu-lh-pels-parents-de-calandrons-16qs42qsp551cxz9
Bona descobèrta !
Cloé Garcia