Lo rapòrt senatorial d’informacion fait al nom de la comission de la cultura, de l’educacion, de la comunicacion e de l’espòrt per la mission d’informacion per la mesa en òbra de la lei del 21 de mai de 2021 (relativa a la proteccion patrimoniala de las lengas regionalas), dita lei Molac, ven de sortir.
A l’iniciativa de dos senators, Karine Daniel e Max Brisson, aqueste document de 85 paginas punta 23 recomandacions favorablas a las lengas regionalas e a lor desvolopament. Aquel rapòrt es important, que fa la pròva que d’unes elegits an mesurat cossí la lei Molac nos fasiá avançar e cossí son desplegament complet demandava de susvelhança ! Demest las 23 recomandacions prepausadas, la 9na nos interèssa particularament, que concernís la clarificacion e la secularizacion dels prètzfaches escolars deguts per las comunas pels mainatges escolarizats dins los establiments nòstres. Conscients de l’enjòc per nosaus, e segurament un pauc trucats de véser tota l’energia desplegada per d’unes per aplicar pas la lei, aqueles dos senators faguèron una analisi factuala de la situacion abans de prepausar de solucions tan constructivas coma realistas. L’associacion ESKOLIM, que recampa totes los rasals immersius, saludèt l’iniciativa abans de prendre a son torn la pluma per demandar als ministèris de l’Interior et de l’Educacion Nacionala de transformar aquelas recomandacions en demanda escrita oficiala al prèp dels prefèctes per fin de sortir d’un foncionar qu’es encara uèi tròp a geometria variabla. Aquel corrièr d’ESKOLIM serà juntat a l’article e convidam totes los associatius a lo socializar alprèp de totes los parlementaris per ensajar de faire bolegar las linhas. I a d’elegits que batanan e d’autres qu’ajudan per de bon e coma la question de la lenga demòra politica, tan val acompanhar los que fan que los que dison qu’un jorn, benlèu, se jamai… faràn !
Joan-Francés Albert