S’endralhèt ongan, pel primièr còp, una formacion per las ajudas mairalas de Lengadòc. Aprèp lo resson de l’experimentacion capitada a Tolosa e Orlhac, d’unes regents de cicle 1, recampats a la jornada pedagogica de Masamet en genièr de 2025, aguèron enveja d’espandir la dinamica costat Lengadòc.
La formacion es menada de cotria amb de regents e ajudas mairalas experimentadas, los PA, la còla d’APRENE, las federacions e las associacions de basa. Nasquèt d’un besonh evident de mai d’immersion dins las classas de mairala. Lo camin de lenga dels mainatges se bota en plaça tre la classa de PS e necessita una immersion totala. Ajudar las ajudas mairalas emplegadas per las associacions a caminar dins la lenga, descubrir la pedagogia Calandreta es la tòca d’aquela formacion.
Lo format de la formacion càmbia en foncion de las regions e de las demandas. Ensajam de respondre lo mai possible als besonhs en tot èsser conscients que demòra una goteta d’aiga dins la mar granda dels besonhs. Remarcam una volontat bèla, un vam vertadièr d’aquelas ajudas de se trobar, d’escambiar, de descubrir per reïnvestir dins las classas. Ongan un vintenat d’ajudas mairalas profitan d’aquesta formacion.
Esperam que se poirà perenizar las annadas a venir e tanben desvolopar dins las autras federacions.
Annia Pla
