Dempuèi sa creacion en 1995, APRENE seguís son ondada arderosa e capuda. Aquesta annada dels 30 ans, deurà çaquelà gasar l’aiga trebola de la refòrma. Tal un pofre, se deurà adaptar (un còp de mai) al substrat cambiadís. O farà sieu, coma sempre. Aquò’s inscrich dins son ADN.
Una causa es clara : volèm marcar lo còp, e prevesèm d’o far lo temps del Congrès Calandreta a Espalion. Alara cridam las personas que costegèron o que costejan l’establiment per tal de testimoniar d’un eveniment, d’una anecdòta, d’un quicòm que poiriá èsser partejat, quin que siá lo format…
S’aquò vos parla, podètz mandar al secretariat d’APRENE (secretariat@aprene.org) o pausar (per los qu’an accès) dins lo dorsièr «30 ans APRENE» a la racina d’Estelum (en pensant de precisar son identitat).
A Espalion, organizarem un espaci per escotar o visionar çò collectat, e se poirà tanben apondre causas dirèctament dins la maquina sus plaça. La còla d’APRENE se tracharà puèi de collegir la matèria reculhida e avisarà en fonccion s’aquò pòt far l’objècte d’una produccion escambiabla.
Tanben, metrem en plaça una mòstra per pausar tota mena de material en ligam amb APRENE (jornals de còla, fotografias, produccions plasticas…).
La serada dels 30 ans se debanarà lo dijòus 14 de mai. D’aquí enlà tenètz vos fièr.a.s, e a lèu de vos veire per cantar e festejar !