Lo concèpte del binòmi es una consequéncia del concèpte del « s’associar per faire
escòla ». Dempuèi temps, Calandreta desvelopa l’idèia que i a plan de ponts de bastir
entre lo pedagogic, l’associatiu, e mai generalament entre totes los actors del projècte,
per capitar de faire societat.
Per d’unes, pòt semblar a una utopia que d’imaginar un modèl de governança
equilibrat e respectuós alara que per nosaus es l’ambicion màger del projècte
Calandreta !
De segur, cal un cap d’establiment per poder aver un establiment, e cal plan un
president, o mai d’un, per dirigir una associacion lei 1901. La complexitat dels nòstres
afars resida justament dins lo fait d’associar los dos mondes.
Dins los faches, un President d’Associacion, coma un cap d’Establiment, es interpellat
sovent a prepaus de problematicas associativas, pedagogicas, salarialas, relacionalas,
amb los collègas, los mainatges, los parents dels mainatges, las familhas entre elas,
las collectivitats, los elegits e mai encara…Aquelas paraulas an plan sovent un
caractèr confidencial e çaquelà las cal partejar e tractar, abans de poder prene una, o,
de decisions.
Lo binòmi cap d’establiment – President es doncas dins una recèrca permanenta
d’equilibri entre totes los actors. Es garant del projècte Calandreta, segur, e
segurament tanben d’una qualitat d’escambis al dintre de l’establiment e de
l’associacion. De fait, es en ligam privilegiat amb la Federacion Regionala e la
Confederacion. La sieuna preséncia dins los moments de representacion de
l’establiment al prèp dels institucionals coma dels elegits apareis coma una necessitat.
Aquel binòmi es pausat, coma se ditz, mas se decrèta pas e lo cal bastir. L’enjòc es ni
mai ni mens que de ganhar una fisança recipròca entre doas personas engatjadas dins
una foncion complèxa e amb de responsabilitats. L’installacion del binòmi pren de
temps e i a pas de règlas escritas per dire de capitar. Es doncas a cadun de trapar la
sieuna formula. Sembla çaquelà necessari que de trabalhar a la sieuna installacion.
La coëréncia del binòmi e en particular la sieuna comunicacion conjunta, coma la
sieuna etica, an totjorn una rasonança positiva dins lo burèu coma dins lo CA e encara
mai al prèp de las familhas. Lo binòmi es de fait lo garant d’una forma d’exemplaritat.
Es dins sas accions justas, dins son ton pendent los diferents acamps, que s’installa
coma un pilar per l’establiment.