Conselh scientific

Un acamp del primièr Conselh Scientific en julh de 2011

 

Pr’amor de la sieuna activitat, 178 regents son estats titularizats per far la classa en immersion en occitan.

Aquò vòl dire que a cada annada escolara que passa, l’estat remunèra quicòm coma 155 000 oras d’occitan corrèctament pagadas.

Fins a 2010, lo ròtle de l’establiment Aprene èra mai que mai de preparar los candidats als concorses.

Gràcias a la cultura tant associativa coma pedagogica e lingüistica, pacientament bastida, espelida dempuèi mai de trenta ans dins las escòlas e las classas Calandreta, permetèt de metre en plaça una formacion exigenta e qu’a provat son eficacitat.

Dempuèi la rintrada d’agost de 2010, las condicions an cambiat : l’encastre novèl de la masterizacion convida nòstre establiment a créisser del costat de l’exigéncia universitària, e mai nos daissa pro de libertat per laurar nòstras especificitats. Pr’amor d’aquò refortissèm nòstras recèrcas, en particular cap a l’immersion lingüistica, la pedagogia institucionala, lo program familhas de lengas, l’istòria, las matematicas, lo patrimòni comun immaterial e los aprendissatges non conscients .

L’establiment Aprene a reformat lo sieu Conselh Scientific ont d’associatius, de regents e d’universitaris s’assòcian per un trabalh de produccion ric e dobèrt. Es una escasença de las bèlas per definir, apregondir, e balhar de carn a un vertadièr sector recèrca a Aprene.

Nascuts dempuèi qualques annadas ja, aqueles domenis de recèrcas prioritàrias resultan de l’experiéncia aquesida.

Fasèm náisser, bailejar e acompanhar de recèrcas aplicadas e de publicacions scientificas apiejadas sus nòstra realitat demercé lo formidable laboratòri per la pedagogia, per l’immersion e pel plurilinguisme que son las nòstras classas Calandreta.
Lo Conselh Scientific d’APRENE n’es lo crusòl, tot d’estrambòrd e de rigor !

Ligam cap als memòris publicats