A Calandreta, la causida de l’immersion totala

La causida de l’immersion totala es ligada, sustot, a la situacion de diglossia de l’occitan. La lenga es rarament parlada dins las familhas e dins la societat. D’aquel fach, un input maximal fa besonh per installar un bilingüisme tan solid coma possible. Los trabalhs de recèrca meton en evidéncia los avantatges cognitius que representa l’aprendissatge precòç d’una lenga estrangièra. Fins a 10 ans, existís una plasticitat cerebrala que desapareis en delà. Pasmens, aprene una lenga estrangièra a l’edat adulta presenta tanben d’avantatges. En fach, quand avisam que los mainatges capitan melhor que los adults, es sovent en situacion quasi naturala (e non pas escolara), amb una longa exposicion a la lenga, e de las interaccions importantas amb de natius o d’autres aprenents.

D’ont la necessitat de començar un mièg e de las situacions d’aprendissatge que sián tan naturals coma possible, amb un public adult coma amb los mainatges. Nòstre projècte es fòrt uèi d’una experiéncia irrefutabla dins lo domeni de l’immersion. Sèm estats las escòlas de l’experimentacion en se lançant dins l’aventura de l’immersion fa mai de quaranta ans e sèm uèi referents e expèrts d’aquel mòde d’ensenhament. Avèm pas cessat de questionar e de far evoluar nòstras practicas en comparason de nòstre trabalh dins las classas, coma de necessaris esclairatges que pòrtan las sciéncias sul subjècte.