La laïcitat es un dels pilars de nòstre ensenhament e de nòstra formacion
Lo respècte de las diferentas cresenças, o abséncias de cresença, e la neutralitat de nòstre ensenhament a lor esgard, es afichat dins nòstres diferents tèxtes, confòrmament als principis de l’educacion nacionala. Dins nòstres programas de formacion, son ensenhament es una de las competéncias e disciplinas principalas. Lo camp de l’istòria e de l’abòrd multicultural son los dos domenis dins los quals un abòrd dels enjòcs de la laïcitat es trabalhat per l’estudi d’un sòcle de coneissenças e per la practica del debat entre escolans.
Dins las practicas de formacion, la laïcitat es aculhida e gerida per mantun de nòstres dispositius cooperatius, en particular dins l’institucion del conselh de cooperativa, ont las decisions, tant d’organizacion que de contengut de trabalh, son decididas en tota transparéncia, e permeton atal de precisar los principis fondamentals d’una escòla laïca. Aquel ponch s’ancora dins la tradicion de la pedagogia Freinet e de la pedagogia institucionala (per rampèl, l’ostal d’edicion de l’Icem, a Canas, s’apelava inicialament CEL: Cooperativa de l’ensenhament laïc), e lo respècte de la laïcitat es de longa verificat de per la participacion frequenta, dins nòstres diferents luòcs d’existéncia escolara, federala e confederala, de las institucions republicanas (comunalas, departamentalas, regionalas).
![](https://aprene.org/wp-content/uploads/2024/06/IMG_5345-1024x683.jpg)