Dempuèi la creacion de las Escòlas Superioras del Professorat e de l’Educacion (ESPE), l’ISLRF e APRENE se cèrcavan un partenari vertadièr per la formacion dels regents dels malhums immersius. Una convencion foguèt signada pel breton entre l’ESPE de Bretanha e l’ISLRF mercés l’ancian president de region e ministre Le Drian ; lo tancatge demorava per las autras lengas.
Aquesta marrida passa s’acaba aqueste 5 de setembre de 2018 amb la signatura a Corti d’una convencion de partenariat entre l’ESPE de Corsega, l’Università Pasquale Paoli e l’ISLRF.
Per la primièra reforma de la formacion dels mèstres, una convencion liguèt l’ISLRF e l’Universitat de Perpinhan amb una maqueta de master MEF-EBI, ensenhament bilingüe e immersiu. Amb la segonda reforma lançada pel president Hollande i aguèt de solucions provisòrias qu’èran pas satisfasentas car las maquetas de master MEEF daissavan pas la plaça a la lenga. Las ESPE mostravan un refús general de considerar l’immersion, nòstra pedagogia e la necessitat de formar los mèstres dins la lenga que lor va servir per ensenhar.
Aquela convencion amb Corsega se marca dins la seguida de la de Perpinhan e permet de tornar trobar lo vam d’aquel camin e d’aver una maqueta que ten compte de l’especificitat de l’immersion.
Ongan 3 lengas son concernidas (alsacian/moselan, catalan e occitan) e 16 estudiants son inscriches en master. En octòbre 10 professors de l’ESPE de Corsega vendràn a Besièrs per un seminari de formacion amb totes los estudiants e los professors de l’ISLRF/APRENE. Tornaràn al moment del Congrès dels 40 ans de Calandreta a Quilhan.
Acampats ièr a Corti, los ensenhaires se mostrèron fòrça interessats per las novèlas tecnologias fargadas per APRENE dins lo cursus de formacion, notadament lo trabalh cooperatiu prepausat dins lo portfolio de cada estudiant.
En preséncia de la Dòna Benetti, rectritz, e totas las autoritats academicas, del professor Romani de l’Università di Corsica, e convidat per la Dòna Dominique Verdoni, directritz de l’ESPE, lo president de l’ISLRF, Joan-Loís Blenet, s’exprimiguèt dins l’amfiteatre del Campus de Corti ont s’èran recampats los ensenhaires, los laureats 2018 dels concorses de 1èr e 2nd gra de l’Acadèmia de Corsega, e tanben e estudiants novèls.
Calandreta foguèt de longa a l’iniciativa d’aquela dinamica de formacion que considera coma la clau del mestièr de regent. Dempuèi la creacion 5 bilingüismes existisson dins l’encastre de l’ISLRF a partir de 6 lengas. Amb la mesa en plaça del Master MEEF se pòt ara parlar de 6 bilingüismes. Lo president constatèt doncas una novèla avançada e insistiguèt sul fach que defendre las lengas minorizadas es mai que mai un biais de se dubrir als autres.
Mai que jamai, amb aquesta signatura, l’ISLRF e APRENE se veson identificats coma lo crusòl de la recèrca a prepaus de la pedagogia del plurilingüisme.
