Los 19 e 20 d’octòbre se tenguèt a l’universitat de Corte un simposium nomenat :
« La corsofonisacion per l’escòla : metòdes, comparasons e planificacions »
Lo programa èra plan cargat mas tras qu’interessent. Las intervencions del dimècres viravan alentorn de las experiéncias internacionalas a prepaus de bilinguisme a l’escòla, e pauc a cha pauc, long dels expausats dels especialistes e cercaires que venián de Pais de Gallas, de Catalonha, de Val d’Aosta, del País Basc, e de Corsega, una evidéncia se dessenhèt, apiejada plan solidament sus las donadas e estudis presentats : lo biais melhor de recuperar de locutors dins una lenga minorisada, es l’immersion. E de luènh !
Los practicians que parlèron la tantossada illustrèron encara mai aquel fach, particularament una jove Professora de las Escòlas, Serena Guaitella, que contèt qu’aviá ensenhat dos ans dins una escòla immersiva publica, mas que l’encastre ajudava pas, particularament l’injonccion de parlar los 25 de cent del temps en francés. Deçaupuda dels resultats cap a l’empleg de la lenga còrsa pels mainatges, s’escampèt dins l’aventura Scola Corsa, e dos ans apuèi, èra espantada del resultats de l’escòla immersiva associativa.
APRENE presentèt qualques aisinas de la formacion cooperativa de mèstres que met en òbra : la potencia de l’espaci de trabalh cooperatiu Estelum, l’eficacitat de l’avaloracion e de la validacion dels estudiants sens cap de nòtas, la pertinéncia del dispositiu « camin de lenga » per capitar d’aver de regentas e regents que la pòrtan vertadièrament la lenga occitana.
L’endeman, lo dijòus 20, una taula redonda de doas oras de temps acampèt monde de l’Universitat Pascal Paoli, Ghjaseppu Turchini President de Scola corsa e tanben de l’associacion dels ensenhaires de còrse, Antonia Luciani e Romain Colonna del Conselh Executiu de la collectivitat de Corsega, e lo Rector de Corsega.
Lo matin, lo deputat Europenc Alfonsi aviá plan enfonçat lo clavèl : «… lo sol biais de salvar la lenga còrsa passa pel sosten a Scola Còrsa per assegurar son desvolopament. Nos cal capitar en dètz ans çò que los bascos faguèron en 50 ans ».
La taula redonda foguèt plan animada, coma se podiá a la vista de la qualitat del intervenaires.
Mas quand Ghjaseppu Turchini prenguèt la paraula per contar cossí lo constat de l’incapacitat de l’escòla publica per formar de locutors de còrse l’aviá menat a decidir, amb una còla plan determinada e solida, de fargar Scola Corsa, o faguèt amb talament de vòia e d’emocion, que l’afar èra plegat.
Lo Rector n’arribèt quitament a li demandar se voliá pas pairinar una o doas escòlas immersivas del public per las ajudar a capitar !
APRENE afortiguèt puèi que l’ISLRF aviá la plena capacitat per formar mond a l’immersion, d’autant mai que l’accòrd quadre amb lo malhum dels INSPE reconéis un percors de Master MEEF immersiu.
La jornada s’acabèt amb una sintèsi de naut nivèl assegurada per Nicolas Sorba e Alan Di Meglio, professors de l’universitat Paoli.
APRENE contunharà d’ajudar a la formacion pedagogica dels ensenhaires e del personal de Scola Corsa.
Aqueste collòqui comptarà de segur dins l’istòria de l’ensenhament del còrse. Quicòm s’es passat de plan important : Foguèt un grand pas en abans per la reconeissénça oficiala de la granda eficacitat de las escòlas associativas immersivas de l’ISLRF.
E, encara mai important : los actors de l’ensenhament del còrse sostenon ara la linha immersiva.
Patrici Baccou, co-director d’APRENE